От ыйын 10 күнүгэр Ил Дархан э.т. Айсен Николаев Арассыыйа Баанын бэрэссэдээтэлэ Эльвира Набиуллинаны кытта көрүстэ.
edersaas.ru
“Өрөспүүбүлүкэ киэҥ сирдээх, дьонун ахсаана аҕыйах, нэһилиэктэр киин куораттан олох ыраах, ойуччу сыталлар, онно суол-иис мөлтөх буолан, нэһилиэнньэ үп-харчы эйгэтин өҥөтүнэн ситэ туһаммат”, – диэн бэлиэтээтэ Айсен Николаев. Онон, бу итэҕэһи көннөрөргө аныгы цифровой технологияны туһаныы наадалааҕа этилиннэ.
Маны таһынан, үгүс дьону долгутар «Таатта» баан кыһалҕатын, уопсайынан, өрөспүүбүлүкэҕэ баан ситимэ бигэ туруктаах буоларын туһунан кэпсэтии барда. Нэһилиэнньэ уурдарыытын страховкалааһын хайысхатынан, тустаах Ааҕыныстыба бу күннэргэ уурдарыылаах дьон харчытын төнүннэрэн барыа.
«Өрөспүүбүлүкэ дьаһалтата ордук улаханнык эмсэҕэлээбит, үптэрин сүтэрбит куорат урбаанньыттарыгар тустаах көмө оҥоруоҕа», — диэн чуолкайдаата Айсен Николаев.
Арассыыйа Баанын бэрэссэдээтэлин кытта өссө былырыын былааннаммыт «Стерх» страховой хампаанньа уонна «Алмаасэргиэнбаан» үбүн улаатыннарыы (докапитализация) туһунан кэпсэттилэр.
Түмүккэ үп-харчы эйгэтигэр оҥоһуллар өҥө хаачыстыбатын тупсарарга икки өттүттэн өйдөһүү таҕыста.
Марианна Тыртыкова, «Саха сирэ», edersaas.ru