Бүгүн Ил Дархан э.т. Айсен Николаев Быыбар киин хамыыһыйатыгар докумуонун туттарда. Кини “Биир ньыгыл Россия” баартыйаттан Ил Дархан быыбарыгар кыттыаҕа.
Бүгүн Айсен Николаев Быыбар киин хамыыһыйатыгар Ил Дархан быыбарыгар кандидат быһыытынан регистрацияланарга докумуонун туттарда. “Бу миэхэ улахан эппиэтинэс. Быыбарга барарбар миигин өйөөбүт дьоҥҥо барыларыгар дириҥ махталбын тириэрдэбин. Бу миэхэ улахан суолталаах уонна көмөлөөх”, — диэн бэлиэтиир Айсен Сергеевич.
Кини билигин дьон-сэргэ аҥаардас араатардааһыны эрэ буолбакка, баар кыһалҕалары, дьыаланы чопчу быһаарары ирдиирин бэлиэтээн туран, билигин өрөспүүбүлүкэҕэ тирээн турар кыһалҕалар тустарынан эттэ. “Билигин халаан уутуттан эмсэҕэлээбит нэһилиэнньэлээх пууннары чөлүгэр түһэриигэ күүспүтүн-уохпутун ууруохпутун наада. Бүгүн улуустары кытары көрсөн бу боппуруоска кэпсэттибит. Олохтоохтор кылгас кэм иһигэр дьиэлэрин-уоттарын оҥостуохтарын наада, ону таһынан социальнай эбийиэктэри чөллөрүгэр түһэрии барыахтаах. Иккиһинэн, бүддьүөппүт туругун көрүөхпүтүн наада. Манна кырата суох сыал-сорук турар. Ону таһынан, кыстыкка бэлэмнэнии үлэтэ күүтэр. Үлэбит элбэх, төттөрү-таары биэтэҥниир бириэмэбит суох”, — диэн бэлиэтиир кини.
Санатан эттэххэ, “Биир ньыгыл Россия” баартыйа бэс ыйын 28 күнүгэр буолбут конференциятыгар дэлэгээттэр кистэлэҥ куоластааһынынан Айсен Николаев кандидатуратын Ил Дархан быыбарыгар туруорбуттара. “Биир ньыгыллары” таһынан, билиҥҥи туругунан, “коммунистартан” Виктор Губарев, “либерал-демократтартан” Гаврил Парахин уоннаНерюнгри оройуонун дьокутаата Александр Силин докумуоннарын туттардылар.
Аграфена КУЗЬМИНА, “Саха сирэ” хаһыат, edersaas.ru