Айсен Николаев: Көҥүл тустууга Аан дойду Кубога Дьокуускайга ыытыллыан сөп
Арассыыйа Спортивнай тустууга федерацията аҕыс сыл тохтобул кэнниттэн, көҥүл тустууга “Аан дойду кубога – 2019” быйыл саас, биһиги дойдубутугар ыытыллар кыахтаах диэн иһитиннэрдэ. Бүтэһигин Кубок Арассыыйаҕа 2011 сыллаахха ыытыллыбыта.
edersaas.ru
Аан дойду кубогын ыытар миэстэнэн Дьокуускай куорат буолуон сөп! Сайын мин “Аан дойду кубога – 2019” Дьокуускай куоракка ыытар туһунан Арассыыйа Спортивнай тустууга федерациятын бэрэсидьиэнигэр Михаил Геразиевич Мамиашвилига уонна көҥүл тустууга Арассыыйа сүүмэрдэммит хамаандатын кылаабынай тириэньэригэр Дзамболат Ильич Тедеевкэ этии киллэрбитим. Кинилэри уонна көҥүл тустуу норуоттар икки ардыларынааҕы федерациятын кытта кэпсэтиигэ аатырбыт тустуук, Ил Түмэн дьокутаата Виктор Николаевич Лебедев көхтөөхтүк кыттыбыта. “Аан дойду кубогын – 2019” ыытыы миэстэтин быһаарыы көҥүл тустуу аан дойдутааҕы тиһэх чөмпүйэнээтин ыытыы кэмигэр ситиһиллибитэ, сайаапка бигэргэнэригэр кыахтар бааллар.
Бу ситиһилиннэҕинэ, кулун тутар 15-18 күннэригэр өрөспүүбүлүкэбит историятыгар аан бастаан Дьокуускайга көҥүл тустууга аан дойду 8 бөдөҥ сүүмэрдэммит хамаандата кэлиэҕэ! Биһиги бу күрэхтэһиилэри үрдүк таһымнаахтык ыытыахпыт диэн эрэнэбит уонна көҥүл тустууга аан дойдутааҕы кубок курдук маннык бөдөҥ норуоттар икки ардыларынааҕы успуор тэрээһинэ Дьокуускай аатын-суолун өрө көтөҕүө уонна бигэргэтиэ. Көҥүл тустууну Саха сиригэр курдук күүскэ таптыыр сир аан дойдуга аҕыйах буолуоҕа уонна биһиги “ыалдьааччыларбыт” бу дьоһун бэлэҕи тутар толору бырааптаахтар.