Саха сирин полициятын ытыктабыллаах үлэһиттэрэ уонна бэтэрээннэр! Эһигини идэлээх бырааһынньыккытынан эҕэрдэлиибин!
Эһиги түүннэри, күнүстэри бэйэҕитин харыстаммакка үлэлээҥҥит — биһиги куораттарбытыгар уонна тыа сиригэр, хас биирдии уулуссаҕа уонна тиэргэҥҥэ дьон-сэргэ нус-хас олохтоох буолуутун хааччыйаҕыт.
Ис дьыала уорганнарын сулууспата чэпчэкитэ суох үлэ. Эһигиттэн үрдүк ирдэбил ирдэнэр: хас биирдии гражданиҥҥа полиция формалаах киһи бэрээдэктээх, сокуону тутуһар, кырдьыксыт буолууну сирэйдээн көрдөрөр. Эһиги быһаччы эбээһинэскит – судаарыстыба уонна уопсастыба иннигэр соруккутун чиэһинэйдик уонна үтүө суобастаахтык толоруу.
Төрөөбүт өрөспүүбүлүкэтэ, дойдута үтүө, бигэ туруктаах буолуутун, дойдулаахтарын олохторугар куттал суоһаабатын туһугар тиһэҕэр тиийэ сокуонунан көмүскээччи аатын биһиги полициябытыгар элбэх профессионал үрдүктүк тутан үлэлиир.
Саха сиригэр быйылгы сыл уон ыйын түмүгүнэн буруйу оҥоруу бэлиэтэниитэ аҕыйаата. Буруйу оҥорууттан дьон өлүүтүн ахсаана 21%-нан кыччыыра ситиһилиннэ. Арылла илик буруйдар ахсааннара аҕыйатылынна. Итинэн Саха сирэ Арассыыйа уон бастыҥ көрдөрүүлээх эрэгийиэннэрин ахсааныгар киирдэ.
Бу уонна да атын ситиһиллибит үлэлэринэн СӨ Ис дьыалаҕа министиэристибэтэ биэдэмистибэннэй сыаналааһын түмүгүнэн эрэгийиэн таһымыгар РФ ИДьМ 84 территориальнай уорганнарыгар 37-с миэстэҕэ таҕыста, Уһук Илин эрэгийиэннэрин ортотугар бочуоттаах миэстэни ылла.
Өрөспүүбүлүкэ хас биирдии олохтооҕо быраабы күөмчүлээһинтэн көмүскэллээх, харысхаллаах буоларын билэрин туһугар өссө да элбэҕи оҥоруохтаахпыт. Бу быраабы араҥаччылыыр органнар үлэһиттэрэ дьыалаларыгар уһулуччу бэриниилээх, ис сүрэхтэриттэн кыһамньылаах уонна кыһалҕаҕа кыһарыйтарбыт киһиэхэ көмөнү оҥорорго бэлэм буолууларын ирдиир.
Ис дьыала органнарын бэтэрээннэригэр бу ыарахан уонна кутталлаах үлэлэригэр үгүс сылларын биэрбиттэригэр туһунан махтанабын.
Ытыктабыллаах доҕоттор, барыгытыгар кытаанах доруобуйаны, дьиэ кэргэҥҥитигэр дьоллоох олоҕу уонна дьон-сэргэ туһугар үлэҕитигэр ситиһиилэри!
СӨ Ил Дархана Айсен Николаев