Ил Дархан э.т. Айсен Николаев бу күннэргэ РФ бырабыыталыстыбатын бастакы вице-премьерин-үп миниистирин Антон Силуановы кытары көрсөн өрөспүүбүлүкэ бүддьүөтүн тэҥнээһин туһунан кэпсэттэ.
edersaas.ru
Манна хамнас үрдээһинин, кыра хамнаһы тиийинэн олоруу алын кээмэйигэр тириэрдии, федеральнай дотацияны кэмигэр тириэрдии, халаан содулун туоратыыга көмө харчы туһунан кэпсэттилэр. Айсен Николаев: “АЛРОСА” хампаанньаттан кэлэр дивиденд көмөтүнэн билигин өрөспүүбүлүкэ бүддьүөтэ, ааспыт ыйдааҕар, син ама буолла”, — диэн иһитиннэрэр көрсүһүү түмүгүнэн.
Федеральнай бүддьүөттэн кэлэр дотация туһунан этэригэр: “Федеральнай бүддьүөттэн кэлэр дотацияны эрдэ ыыталларыгар көрдөстүм. Билигин биһиги от ыйыгар, атырдьах ыйыгар хотугу улуустарга таһаҕаһы таһыыны саҕалыахпыт. Онон дотация биһиэхэ эрдэ кэлэрэ наада этэ”, — диэн бэлиэтиир.
Санатан эттэххэ, ааспыт нэдиэлэҕэ Ил Түмэн сессиятыгар үп сүрүн сокуонугар уларыйыылар киирдилэр. Бүддьүөт дохуоттаах чааһа миллиард кэриҥинэн улаатта. Бу уларыйыы федеральнай бүддьүөттэн эбии харчы кэлбитин кытары сибээстээх. Ол иһигэр 846,4 мөл. солк. кыра хамнаһы үрдэтиигэ кэллэ. Онон билигин бүддьүөппүт дохуота 193,9 млрд солк. тэҥнэстэ. Оттон ороскуота – 195,6 млрд солк. буолла.
Аграфена КУЗЬМИНА, «Саха сирэ» хаһыат, edersaas.ru