Айсен Николаев: “Саха киинэтинэн киэн туттабыт”

Бөлөххө киир:

Ил Дархан эбээһинэһин толорооччу Айсен Николаев «Тыгын Дархан» киинэни уһулар сирдэригэр сырытта. Кинини Моҕол ураһаҕа киллэрэн, киинэ хайдах уһулла сылдьарын, хайдах үлэлииллэрин-хамсыылларын кэпсээтилэр, урут уһулбут каадырдарын көрдөрдүлэр. 

Айсен Сергеевич бу кэнниттэн уһулла кэлбит дьону-сэргэни кытары кэпсэттэ уонна суруналыыстар ыйтыыларыгар хоруйдаата:

—  Саха киинэтэ кэнники сылларга сүрдээҕин сайдан турар диэн сыаналыыбын. Аҕыйах сыл анараа өттүгэр Москватааҕы киинэ бэстибээлигэр саха киинэтэ кыайыа диэбиттэрэ буоллар, ким да итэҕэйиэ суох этэ. “Тыгын Дархан” киинэ – бу бэйэбит устуоруйабыт, сахалар хантан кэлэн, хайдах сайдан, норуот быһыытынан үөскээбиппит туһунан кэпсиир. Ол иһин биһиэхэ норуот быһыытынан салгыы сайдарбытыгар наадалаах киинэ. Барыта ситэн-хотон, үчүгэйдик уһуллан таҕыстаҕына, Саха сирин, Арассыыйа, баҕар, табылыннаҕына, аан дойду олохтоохторугар да интэриэһинэй киинэ буолуо дии саныыбын.

 

Саха киинэтэ билигин бэркэ сайдан иһэр, ону тэҥэ улуу инникилээх буолуохтаах. Төһө да ороскуоттаах буоллар, “Тыгын Дархан” курдук киинэлэри устуу хайаан да наада. Миэхэ устубут каадырдарын көрдөрдүлэр, киһи сөҕөр-махтайар. Быйыл устан бүтэрдэхтэринэ, эһиил улахан экраҥҥа тахсыаҕа. Бу өрөспүүбүлүкэбитигэр эрэ буолбакка, Арассыыйа киинэтигэр улахан суолталаах түгэн. Саха сирин олохтоохторо киинэбитин киэн туттар кыахтаахпыт.

Киинэ режиссера Никита Аржаков, Айсен Николаев уонна Андрей Борисов. 

— Киинэ эйгэтэ бастаан атаҕар туруутугар судаарыстыба көмөлөһүөхтээх дии саныыбын, онтон бу салаа салгыы бэйэтэ сайдан, эбиитин, өрөспүүбүлүкэ экономикатыгар көмөлөһүөн сөп. Култуура, духуобунас эрэ өттүттэн буолбакка, экономика өттүттэн эмиэ сүрдээх интэриэһинэйдик, тэтимнээхтик сайдар хайысха.

Дьокуускай хотугу кинематограф киинэ буолар кыахтаах. Биһиэхэ ол туһугар барыта баар – кэрэ айылҕалаахпыт, тыһыынчанан сыллаах баай култууралаахпыт, үлэһит, үтүөкэн дьонноохпут. Саамай сүрүнэ, Улуу Бүөтүр (Петр I) эппитинии, аан дойдуга түннүгү арыйан эрэбит. Аан дойду саха киинэтин туһунан биллэ, ол суолтата улахан. Онон өйүүр эбээһинэстээхпит, — диэн Айсен Николаев эттэ.

Ангелина ВАСИЛЬЕВА, «Саха сирэ» хаһыат, edersaas.ru

Андрей Сорокин түһэриилэрэ.

+1
0
+1
0
+1
0
+1
0
+1
0
+1
0
+1
0