Айсен Николаев Япония хампаанньаларын кытары кэпсэттэ

Бөлөххө киир:

Ил Дархан Айсен Николаев салайааччылаах Саха сирин дэлэгээссийэтэ Японияҕа “Мицуи”, “Марубени” корпорациялар салалталарын, Япония тас дойдулары кытары үлэлэһэр миниистирин солбуйааччытын Абэ Тосикону, РФ посолун Михаил Галузины кытары көрсөн Өлүөнэ өрүһү туоруур муоста, хотугу улуустар инфраструктураларын туһунан кэпсэттэ.

edersaas.ru

“Мицуи” корпорация вице-бэрэсидьиэнин Сатоси Танаканы кытары көрсүһүүгэ Саха сирин инфраструктуратын туһунан кэпсэттилэр. Чуолаан, Өлүөнэ өрүһү туоруур муоста туһунан. Бу муоста тутуутун Саха сирин салалтата 2013 сылтан саҕалаан сытыытык туруорар. Бу бырайыакка Кытай Народнай Өрөспүүбүлүкэтэ ылсыбыта. Билигин аны Япония хампаанньалара интэриэһиргээн эрэллэр.
Ону таһынан дэлэгээссийэ “Умный город” айти-бырайыак туһунан кэпсээтэ. Санатан эттэххэ, Айсен Николаев Дьокуускай куорат баһылыгынан олорон, бу бырайыакка кыттыспыта. Быйыл “Куораттар уонна олохтоохтор” диэн норуоттар икки ардыларынааҕы үһүс конференцияҕа Дьокуускай куорат “Ростелеком” хампаанньаны кытары “Умный город” бырайыагы киллэрэргэ дуогабар түһэрсибитэ. Бу бырайыак киин куорат инфраструктуратын биир ситимҥэ киллэриэхтээх.
Ил Дархан бу соторутааҕыта инвестицияҕа Анал этиитин таһаарбыта. Онно арктика, хотугу улуустарыгар ураты болҕомтону уурбута. Чуолаан, энергетика боппуруостарыгар. Онон Айсен Николаев Японияҕа сырыытыгар арктика улуустарыгар тыалынан, күн уотунан барар пааркалар тустарынан кэпсэттэ. Саха сиригэр Тиксиигэ Япония хампаанньата кыттыгастаах тыал күүһүн туһанар улахан комплекс тутуллубута. Бу арктика, хотугу улуустар сайдыыларыгар улахан оруоллаах.
“Марубени” корпорация дириэктэрин Эйдзи Окаданы кытары көрсүһүүгэ Ил Дархан балыыһалар оборудованиеларын туруоруу боппуруостарын туруорда. Даҕатан эттэххэ, биһиэхэ искэни, сүрэх ыарыыларын эмтиир диспансердар тутуллуохтаахтар.
Оттон Тас дойду дьыалаларын миниистирин солбуйааччытын уонна Японияҕа Арассыыйа посолун көрсүһүүлэригэр Саха сирэ Хоккайдо префектуратын кытары түһэрсиэхтээх сөбүлэһиитин таарыйдылар. Ону таһынан Япония инвестордарын кытары үлэлэһиини кэпсэттилэр.

Аграфена КУЗЬМИНА, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0