Айыҥа: «Сүргэм көтөҕүллэн сылдьабын»

Ааптар: 
Бөлөххө киир:

Андрей Кривошапкин-Айыҥа, былыргы түүр тылын, руна суругун чинчийээччи:

— Үбүлүөйдээх Манчаары Оонньуулара төрөөбүт улууспар ыытыллалларыттан олуһун диэн сүргэм көтөҕүллэн сылдьабын. Маннык улахан тэрээһиннэр улуус инники сайдыытыгар туһалара улахан. Мин дойдубар сылын аайы сылдьабын, ол эрэн, быйылгы курдук далааһыннаах тутуу ыытыллыбытын  өйдөөбөппүн. Холобур, Оонньуулар ыытыллыбатахтара буоллар, бу турар болуоссаппыт, ити уулуссаларбыт оҥоһуллуо суоҕа, «Үс Хоһуун» стадиоммут тутуллуо суоҕа этилэрэ. Итиэннэ Култуура дьиэтэ дьэндэйдэ, саҥа ипподромнанныбыт.

Өрөспүүбүлүкэтээҕи күрэхтэһиигэ бэриллэр үбү дьоммут сөпкө, көдьүүстээхтик туһаннылар диибин. Уонна бу кэлиҥҥи түөрт сыл устата биир дойдулаахтарым эдэриттэн эмэнигэр тиийэ Манчаары Оонньууларыгар сүрдээҕин кыһаллан туран бэлэмнэммиттэрин бэлиэтиибин.

Күрэхтэһии туһунан этэр буоллахха, улууспут хамаандатыгар кыргыттарга сүүрүүгэ Арассыыйа чөмпүйүөнэ, өрүс уҥуорбутугар, Далырга, киирэҕэ Европа призера уонна аан дойду Кубогын хаһаайына, хапсаҕайга Саха сирин икки абсолютнай кыайыылааҕа бааллар. Онон эрэх-турах сананан турабын. Урукку сылларга сүүрүк сылгыны туппат буоламмыт, ат сүүрдүүтүгэр хотторуулаах хааларбыт, оттон быйыл түөрт уон ат күрэстэһэриттэн тоҕуһа биһиги сүүрүкпүт. Онон миэстэлэһэр инибит…

Ити курдук, быйылгы үбүлүөйдээх Оонньууларга үөһээ бүлүүлэр хаһааҥҥытааҕар  да эргиччи бэлэмнээхпит дии саныыбын.

Роман ПОПОВ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0