Сунтаар улууһун Бордоҥнооҕу «Айыллаан» култуура киинэ кыһыл көмүс үбүлүөйүн бэлиэтиир дьоро күннэрэ бар дьону түмтэ. Сэтинньи сэттистиир күнүгэр 1967 сыллаахха тэриллибит Бордоҥ кулууба билигин нэһилиэк эрэ таһымыгар буолбакка, улуус, Саха сирин, бүтүн Арассыыйа таһымыгар бастыҥ ааты ылбыт тэрилтэ.
Мария Кобельянова, edersaas.ru
Салайааччы СӨ култууратын үтүөлээх үлэһитэ, байанайдаах булчут, спортсмен бэрдэ Василий Спиридонов, уус уран салайааччы СӨ култууратын туйгуна, ырыаһыт, үҥкүүһүт, мааны кыыс Мария Спиридонова уонна эдэр кыргыттар-уолаттар Эльвира, Лидия, Надежда, Станислав, кулууп ийэтэ Наталья, ааттаах артыыс Битээлий уонна охранник уолаттар түбүктээх, үтүө түмүктээх үлэлэринэн үбүлүөйдэрин бэрт сэргэхтик тэрийдилэр. Бастакы күҥҥэ нэһилиэк дьонугар, ыалдьыттарыгар улахан айар киэһэни уонна биэс миэтэрэлээх минньигэс туордунан кэлбит ыалдьыттары күндүлээтилэр.
Иккис күнүгэр, өрөгөй түһүлгэтэ төрүттэнэн, тэрээһин саҕаланыыта Бордоҥнор бэйэлэрин кыыстара Ольга Захарова уонна күтүөттэрэ Радомир Сергеев айан таһаарбыт «Айымньылаах Айыллаан» диэн киинэлэрин көрдүбүт.
Бу киинэ соторутааҕыта «Саха» НКИК ханаалыгар көстүбүтэ. Ол кэннэ, сыана тэлэччи аһыллан ытык-мааны ыалдьыттар итии-истиҥ эҕэрдэлэрэ этилиннэ. Нэһилиэк баһылыга Гаврил Черепанов эҕэрдэтин анаан баран, үөрүүлээх түһүлгэ ортотугар «Нэһилиэк бочуоттаах олохтооҕо» диэн үрдүк наҕараадалары Дьоруой ийэ Галина Егоровна Петроваҕа уонна улуус дьокутаатыгар Галина Алексеевна Лукинаҕа туттарда. Улуус баһылыгын социальнай уонна имиджевай бэлиитикэҕэ солбуйааччы Ульяна Попова, култуура салалтата, култуура профсойууһа, Олоҥхо дьиэтэ, Сунтаардааҕы оҕо муусукатын оскуолата, улуус дьокутааттарын Сэбиэтэ, Сунтаардааҕы Ис дьыала, С.А.Зверев аатынан түмэл, Тэҥкэ дьаһалтата, Күндэйэ кулууба уонна нэһилиэк тэрилтэлэрэ, бэтэрээннэрэ эҕэрдэлэрин этэн, сэмэй бэлэхтэрин туттардылар. Сардаҥа сардаҥатынан илгийэр «Айыллаан» КК урут-уруккаттан дьиэ кэргэн тапталынан угуттанан сып-сылаас истиҥ сыһыан ситиһиитэ буолан, оҕо курдук бүөбэйдэнэн билиҥҥи кулууп төһө да кырдьаҕас буоллар тупсаҕай, үтүө туруктаах турдаҕа! Бу күн кулуубу туппут кырдьаҕастары, үлэлээн ааспыт дьону чиэстээтилэр. Ону кытта «Сыана бэтэрээнэ» диэн үрдүк ааты уон киһи ылан үөрүүлэрэ үксээтэ. Түмүккэ, бары биир сомоҕо буолан Айыллааны ыллаан эҕэрдэлээтилэр! Айыллааннарга өссө төгүл эҕэрдэ, өссө да Айа, Ыллыы сылдьыҥ, айар үлэҕит таһаарыылаах буоллун!
Мария Кобельянова-Тускулаана, «Эдэр саас» сайтка анаан