Олунньу 4 күнэ – искэн ыарыытын утары охсуһар Бүтүн аан дойдутааҕы күн.
Саха сиригэр бу уодаһыннаах ыарыыттан өлүү инники миэстэлэргэ сылдьарын сылга 1200-тэн элбэх киһи олоҕо быстара туоһулуур. Статистика көрдөрөрүнэн, сыл аайы 2 тыһыынчаттан тахса саҥа ыарыһах булуллар.
Надежда ЕГОРОВА, «Саха сирэ» хаһыат, edersaas.ru
Биир күн куорат олохтоохторо онколог-быраастан сүбэ-ама ылар, медицинскэй профилактика өрөспүүбүлүкэтээҕи киинигэр сылдьар кыахтаныахтара. Ону тэҥэ эмиийгэ, куртах-оһоҕос уорганнарыгар искэни быһаарыыга маастар-кылаастарга кыттыахтарын сөп.
Өрөспүүбүлүкэҕэ биир улахан Бүлүү улууһун эмчиттэрэ көрдөрүү урукку сыллардааҕар мөлтөөн иһэриттэн долгуйаллар. Ол курдук, урукку кэмнэргэ сылга 26-27 киһиэхэ искэн үөскүүр буоллаҕына, 2016 с. искэн ыарыылаах 46 киһи булулунна. Бастакы миэстэҕэ – тыҥа, иккискэ – көнө оһоҕос, үһүскэ дьахтар төрүүр-ууһатар уорганын искэннэрэ киирэллэр.
Аан дойдуга барытыгар да улахан долгуйууну таһаарар уодаһыннаах ыарыыны эрдэттэн сэрэтэр, бэйэ доруобуйатыгар болҕомтону уурар туһуттан олунньу 4 күнүгэр киин куоракка араас акциялар ыытыллыахтара.
– Искэн ыарыыларын өрөспүүбүлүкэтээҕи диспансера уонна Дьокуускай куораттааҕы Медицина киинэ олунньу 4 күнүгэр 09.00-13.00 чааска диэри Саха академическай тыйаатырын дьиэтигэр ыарыыны сэрэтиигэ анаммыт акцияҕа ыҥыраллар.
— Куорат 1 №-дээх поликлиникатыгар нэһилиэнньэни уролог, кардиолог уонна терапевт быраастар көрүөхтэрэ. Наада буоллаҕына, ЭКГ, былчархай УЗИ-тыгар ыытыахтара.
— 2 №-дээх балыыһаҕа (Кузьмина уул. 3) терапевт-быраас көрүөҕэ уонна УЗИ-га уһулуохтара.
— 3 №-дээх балыыһаҕа (Лермонтов уул. 121) кэлбит дьон урологка, гинекологка уонна терапевка көрдөрүнүөхтэрэ.
Акцияҕа кыттарга пааспаргытын, СНИЛС уонна медицинскэй полискытын умнумаҥ.
Надежда ЕГОРОВА, «Саха сирэ» хаһыат, edersaas.ru