Ил Дархан Егор Борисов Гражданскай форумҥа Актыбыыстар күннэрин тэрийэн, коммерческайа суох уопсастыбаннай түмсүүлэри судаарыстыбаннай сакааска сыһыаран, бу түмсүүлэри өйүүр тэрилтэлэргэ нолуоктарыгар чэпчэтиини көрөн бу эйгэҕэ сайдыы суолун торумнаата.
Аграфена КУЗЬМИНА, “Саха сирэ” хаһыат, edersaas.ru сайт.
Егор Афанасьевич бэлиэтииринэн, регион сайдыыта норуот уонна былаас хайдах үлэлэһэллэриттэн быһаччы тутулуктаах. “Өскөтүн биһиги түргэнник, балысханнык сайдыахпытын баҕарар буоллахпытына, күүспүтүн түмүөҕүҥ. Төһөнөн бары бииргэ үлэлиибит да, оччонон үлэбит таһаарыылаах буолуоҕа. Оттон “былаас быһаардын” диэн баран күүтэн олорор буоллахпытына, күттүөннээх үлэ тахсыа суоҕа, сайдыыбыт бытааннык барыаҕа”, — диэн этэр кини.
Салгыы кини дьон-сэргэ кэнники кэмҥэ кыһалҕатын куттаммакка этэр, санаатын былааска тириэрдэр буолбутун бэлиэтиир.
— Дьон-сэргэ санаатын аһаҕастык этэр буолла, өрөспүүбүлүкэ күннээҕи олоҕор быһаччы кыттыһар. Кыһалҕаны быһаарыыга биир тылы булар буоллубут. Ити өрөспүүбүлүкэҕэ эрэ буолбакка, Уһук Илин регионнарга, Россияҕа эмиэ сыһыаран этэбин, — диэн этэр Егор Афанасьевич.
Манна даҕатан эттэххэ, Егор Борисов уопсастыбаннас көҕүлээһинин өйүүргэ, норуот өрөспүүбүлүкэ күннээҕи олоҕор быһаччы кыттыһыытыгар улахан болҕомтотун уурар. Ол курдук, норуот көҕүлээһинин өйүүр департамент министиэристибэҕэ тиийэ үүннэ. Сылын аайы министиэристибэ нөҥүө хас да бырайыак үбүлэнэн олоххо киирэн, дьоҥҥо-сэргэҕэ туһалыы турар. Кэлиҥҥи алта сылга барыта 3 млрд солк. тахса суумалаах көмө оҥоһулунна. Ону ааһан, түмсүүлэр өрөспүүбүлүкэ социальнай-экономическэй хайысхатыгар күүс-көмө буолаллар.
“Коммерческайа суох түмсүүгэ киһи баҕа өттүнэн үлэлиир, волонтердар судаарыстыба сорох боломуочуйатын ылыналлар. Холобур, Тиксиигэ, Нерюнгрига ыксаллаах түгэн үөскээбитигэр, олохтоохтор бэйэлэрэ ылсан кыһалҕаны быһарыыга кыттыспыттара. Ол түмүгэр кыһалҕаны түргэнник быһаарбыттара. Норуот хонтуруола олус күүстээх. Бу буолар үтүө холобур”, — диэн этэр кини.
Манна сыһыаран, Ил Дархан түмсүүлэри үбүлээһин чааһыгар күүскэ өйүөххэ наадатын эттэ. Ол курдук, граннары, субсидиялары биэриигэ анал ыйаах бэлэмнэниллиэҕин, судаарыстыбаннай сакаас, ордук социальнай өттө, коммерческайа суох түмсүүлэргэ эмиэ бэриллиэхтээҕин, бу түмсүүлэргэ көмөлөһөр тэрилтэлэргэ нолуок өттүгэр чэпчэтиилэри көрүөххэ наадатын иһитиннэрдэ.
Ону таһынан, уопсастыбанньыктартан ураты үчүгэй экспертэр суохтарын бэлиэтээн туран: “Уопсастыбаннай түмсүүлэр сокуон өттүгэр эмиэ үлэлэһиҥ. Туох тиийбэтин көрө сылдьан министиэристибэлэр, биэдэмистибэлэр нөҥүө сокуон оҥоруутугар көмөлөһүҥ. Дьоҥҥо-сэргэҕэ сүбэ-ама буолуҥ”, — диэн бэлиэтээтэ. Уонна түмүккэ, Гражданскай актыбыыс күнүн бэлиэтииргэ диэн этии киллэрдэ.
Аграфена КУЗЬМИНА, “Саха сирэ” хаһыат, edersaas.ru сайт.