close
“Алаас ыалын” быйаҥнаах тэлгэһэтигэр
Олох-дьаһах - Тыа сирэ

“Алаас ыалын” быйаҥнаах тэлгэһэтигэр

 Мэҥэ-Хаҥалас улууһугар 1997 сылтан, ол аата төгүрүк  сүүрбэ сыл устата үлэлиир Алаас ыала уопсастыбаннай түмсүү күн бүгүнүгэр диэри үгүс дьону хабан, бэрт көхтөөхтүк үлэлиир. 

edersaas.ru


Ол курдук, соторутааҕыта “Быйаҥнаах тэлгэһэ” диэн үгэс буолбут дьаарбаҥкаҕа дьиэ кэргэнинэн  уонна нэһилиэктэр бэйэлэрэ хамаанда тэринэн киирэннэр, 8 көрүҥҥэ күрэхтэстилэр.

Быйылгы дьаарбаҥка биир сонун көстүүтүнэн Майаҕа олорор рационализатор Константин Иннокентьевич Неустроев саҥа айбыт үлэлэрэ буоллулар. Бу – илии үлэтин чэпчэтэр, дьиэҕэ-уокка олус наадалаах оҥоһуктар. Ол курдук, уһуннук умайар, тыа сирин дьиэтин-уотун үчүгэйдик сылытар хочуол, массыынаҕа иилиллэр, хаһаайыстыбаҕа, оҕуруокка туһаныллар бырысыап, итиэннэ “УАЗ” массыынаҕа тиэнэ сылдьар уу баһар дьоҕус тиэхиньикэ дьон-сэргэ улахан болҕомтотун тартылар.

—Бу кэнники сылларга Константин Иннокентьевич отонноох мас арааһын үүннэриинэн эмиэ дьарыктанар, инньэ гынан, бу “Алаас ыала” түмсүүгэ  кэлэн семинарга кыттан, үлэтин уопутун кэпсээн, дьону улаханнык сэргэхситтэ, интэриэһиргэттэ. Кини аны кыһын сэтинньи бүтүүтэ, дьиэ-уот туттар, дьиэтин ититэр систиэмэтин саҥалыы тардыан баҕалаах дьоҥҥо итиини кэмчилиир, дьиэни үчүгэйдик сылытар ситими оҥорорго анаан-минээн лекция ааҕар, сүбэ-ама биэрэр былааннаах, — диэтэ улуустааҕы «Алаас ыала» түмсүү салайааччыта Евдокия Саввична Решетникова.

Ити курдук, тыа сиригэр дьон бэйэ-бэйэтигэр көмөлөсүһэн, сүбэ-ама бэрсэн, көхтөөхтүк олорор, онуоха “Алаас ыала” түмсүүгэ киирэннэр эр дьон  ордук көх-нэм буолаллара бэрт үчүгэй.

Хаартыскаҕа: рационализатор Константин Неустроев.

 

Татьяна МАРКОВА, «Саха сирэ» хаһыат, edersaas.ru 

1
1

Сайт матырыйаалларын ааптар көҥүлэ суох ылар бобуллар.
Facebook
Facebook
Instagram
GOOGLE
http://edersaas.ru/alaas-yalyn-byja-naah-telge-etiger/
  1. 1 санаа

    Уруйэ Арамаан

    Учугэй ыстатыйа. Билигин киьи киьиэхэ сыьыана , кыьамньыта сыппаан иьэр кэмигэр маннык сонуннар тахсаллара, киэн арана5а истиитигэр, дьуулугэр туруулара наьаа наадалах дии саныыбын. Киьи киьиттэн уерэниэхтээх, утуе холобуру ылыныахтаах, туьаныахтаах. Онно дьэ бу истин сахалыы тыллаах, сонуну тар5атар хаьыаттар наадалар! Тыа киьитэьин, кыьын босхо хаьыаты ылан уерэн олорбутум. Ыалынан тар5аммат буолла да, хаьыакка тиксибэппин, сонуну аахпаппын! Ким тиксибит барытын хомуйан барар диэн хомойо саныы олоробун. Эрэдээксийэ маны аа5ар буолла5ына, толкуйдуон сеп эбит. Хаьыат кеннеру аа5ааччыга тиийбэт буолла, ол чахчы.

    13.09.2017

INSTAGRAM ЛИЭНТЭТЭ

Instagram батыһан бар