АЛБЫН ЛОТЕРЕЯЛАР

Бөлөххө киир:

Лотереяҕа сыаналаах бириис сүүйэн ылар олус долгутуулаах уонна үөрүүлээх буолааччы. Ол эрээри, былырыын Үс Хатыҥҥа Туймаада ыһыаҕар «Алаһа дьиэ алгыһа» диэн кэнсиэргэ дьиэлээх сир учаастагын сүүйбүт Валерий Гаврильевка сүүйүүтүн күн бүгүҥҥэ диэри туттара иликтэр. Кыайыылаах киһи бирииһин ирдэһэ лотерея тэрийээччигэ, «Сахаграндстрой» хампаанньа хонтуоратыгар хаста да тиийэ сылдьыбытын кэлин кэлээр диэн көһөрөн испиттэр. Биирдэ тиийбитэ, тэрилтэ олох да сабыллан, суола-ииһэ сүтэн-оһон хаалбыт.

edersaas.ru


Итэҕэлтэн тахсыбыт тэрилтэ

Эдэр киһи салгыы аахса барбатах, суоҕу суоран ылыа да, арай кыһыытын социальнай ситим Instagram нөҥүө суруйбут уонна эрэ­дээксийэни көмөлөһөргө көрдөспүт. Валерий дьиэ ылар эрэлин сүтэрэн, полицияҕа да, борокуратуураҕа да үҥсүбэтэх.

«Сахаграндстрой» тэрилтэни интэриниэт ситимигэр киирэн көрдөөтөххө, лотереяҕа эрэ буолбакка, дьиэ тутуутугар эмиэ үгүс киһини албыннаабыт тутуу хампаанньата эбит. Форумнар, социальнай ситимнэр олох оргуйан олороллор. Тутааччылар үлэлээн баран хамнастарын сатаан ылбатахтар, Хаҥалас улууһугар 9 ыалга «Тыа сирин бигэ сайдыыта» бырагыраама иһинэн социальнай төлөбүр быһыытынан чааһынай дьиэ тутан биэриэх буолбуттар да, дуогабар эбэһээтэлистибэтин толорботохтор. Дьон суукка биэрээри ай­даан тардыбыттар. Онон, элбэх киһини, албыннаабыт, итэҕэлтэн тахсыбыт тэрилтэ.

«Сахаграндстрой» төлөпүөннэрин булан эрийэ сатаатым да, арахса сылдьар.

3000-4000 солк. билиэттэр

Кэлиҥҥи кэмҥэ куоракка биир да кэнсиэр лотереянан мончууктааһына суох барбат. 3000-4000 солк. сыаналаах билиэти атыылаан, бирилийээн киэргэл, даача, сир учаастага, кыбартыыра, чааһынай дьиэ, массыына, нуорка саҕынньах, ынах-сүөһү идэһэтин барытын эрэннэрэллэр. Дьон онно ымсыыран, хам­настарын ууран туран хастыы да билиэти ылаллар уонна ити көстөрүн курдук, сороҕор албыҥҥа киирэн биэрэллэр. Босхо сыыр кутуйаҕы тутар эрэ сиргэ баар диэн норуот өс хоһооно баар.

Тустуук кыһыыта

Маныаха маарынныыр албыҥҥа аан дойду үрдүнэн биллэр-көстөр спорт сулустара кытта киирэн биэрэллэр. Көҥүл ­тустууга Азия чөмпү­йүөнэ, бөдөҥ, бааһынай хааннаах боруода уол, элбэх кыыс сүрэҕин уулларбыт бил­лиилээх спортсмен Айаал Лазарев тур­нирга кыайбыт би­рииһин: дьиэлээх сир учаастагын аҕыс сыл тухары кэтэһэр, күн бүгүҥҥэ диэри ыла илик.

Ол туһунан кини эмиэ Instagram нөҥүө суруйбут.  2010 с. сааһыары Мэҥэ Хаҥалас ­улууһугар Михаил Малардыров кэриэһигэр хапсаҕайга өрөспүүбүлүкэтээҕи турнир буолбута. Быыппастар быччыҥнаах сахаҕа бастыҥ бөҕөстөр мустан, дьиэлээх сир учаастагын ылар туһугар киирсибиттэрэ, хара көлөһүннэрин тохпуттара. Тэрийээччи Михаил Малардыров уола Петр Малардыров уолаттарга элбэҕи эрэннэрбитэ да онтун толорбокко аҕатын аатын киртитэ, дьон элэгэр бара сылдьар.

Көбүөргэ тыҥааһыннаах улахан киирсии түмүгэр Айаал Лазарев финалга ааттаах-суоллаах Увар Тимофеевы хам баттаан, күүһүнэн баһыйан, абсолютнай чөмпүйүөн аатын ылбыта. Киниэхэ кылабачыгас мэтээли кытта чааһынай дьиэҕэ сэртипикээт туттарбыттара даҕаны, онто билигин кумааҕыта эрэ баар.

“Дьиэ, сир учаастагын туруорбут күрэхтэ­һиилэригэр  өрөспүүбүлүкэ бастыҥ бөҕөстөрө киирсибиттэрэ. Күрэхтэһиигэ кыайбытым да үрдүнэн, баччааҥҥа диэри дьиэм да, учаастагым да суох. Петр Малардыровы эккирэтэ сатаабытым, эрэннэрбитин толорбото», — диэн Айаал Лазарев суруйбут уонна видео устан, ютубка укпут.

«Мэрия лотереяны бобор»

Антонида Корякина, Туймаада ыһыаҕын тэрийэр Дьокуускай куорат дьаһалтатын култуураҕа управлениетын салайааччыта:   

— Туймаада ыһыаҕар лотерея ыыталларын биһиги, дьиҥэр, кытаанахтык бопсобут. Ол да үрдүнэн, сорох кэнсиэр тэрийэр бөлөхтөр лотерея оонньоппут буолаллар, биһигини ол туһунан сэрэппэттэр. Быйыл «Үс Хатыҥ» ыһыахтыыр сиргэ 257 түһүлгэ тэриллэр, онно барытыгар араас кэнсиэрдэр, күрэхтэр, тэрээһиннэр ыытыллыахтара. Хас биирдии тэрилтэ түһүлгэтин бэйэтэ дьаһанар, хонтуруоллуур. Онон, лотереяҕа албыннаппыт дьон лотерея тэрийээччини булан, киниттэн ирдэһиэн наада. Ыһыаҕы тэрийэр бөлөх ол туһунан эрдэттэн сэрэтэр.

Албыннаппыт дьон бырааптарын суут-со­куон көбүөрүгэр ким көмүскүүрүн, эрэннэриллибит бирииһи хайдах ирдэһиэххэ сөбүн билээри, СӨ Борокуратууратыгар эрэдээксийэ  аатыттан сурук суруйдубут. Ол сурукпутугар маннык эппиэт кэллэ.

Марианна Рожина, сонуну киэҥник тарҕатар, көрдөрөр-иһитиннэрэр үлэҕэ СӨ Борокуруорун старшай көмөлөһөөччүтэ:

— Лотереяны тэрийии уонна ыытыы бэрээдэгэ 2013 с. сэтинньи 11 күнүгэр тахсыбыт 138 №-дээх федеральнай сокуонунан көрүллэр. Ким туох эппиэтинэстээҕэ, лотереяны тэрийиини хонтуруоллааһын барыта онно сурулла сылдьар.

Ити сокуон 2 ыстатыйатыгар олоҕуран, лотерея диэн дуогабар быһыытынан ыытыллар оонньууга тэри­йээччи бирииһи туруорар, оттон сүүйбүт киһи ол бирииһи кыайбыта чуолкайданнаҕына, ылар бырааптаах.

Лотерея туһунан федеральнай сокуон 20 ыстатыйатын быһыытынан, сүүйүүлээх киһи бирииһин, эбэтэр төлөбүрүн лотереяҕа кыттарга дуогабарга олоҕуран, ирдэһэр кыахтаах.

Лотереяны ыытыы сокуона кэһилиннэҕинэ, тэрийээччи адми­нистративнай эппиэтинэскэ тардыллар. РФ КоАП 14.27 үһүс чааһыгар юридическэй сирэй бирииһи биэрэртэн аккаастаннаҕына, болдьоҕун уһаттаҕына, дьон сүүйүүтүн төлөөбөтөҕүнэ, 100 тыһ. солк. тиийэ ыстарааптанар.

Лотереяны оонньоторго бырааптара кэһиллибит, сүүйбүт бириистэрин, харчыларын сатаан ылбатах дьон олорор сирдэрин аадырыһынан Борокуратуура уорганнарыгар, эбэтэр нолуогабайга сайабылыанньа суруйан, тустаах бэрэбиэркэ ыытыллан, буруйдаах дьону эппиэтинэскэ тардыахха сөп. 2012 с. балаҕан ыйын 11 күнүгэр тахсыбыт РФ Бырабыыталыстыбатын 913 №-дээх уурааҕар олоҕуран, бу эйгэҕэ судаарыстыбаннай хонтуруолу кинилэр ыыталлар.

Маны таһынан, лотереяҕа сүүйбүт киһи бирииһин сатаан ылбатах, онто көһөрүллүбүт, уһатыллыбыт түгэнигэр РФ Гражданскай кодексатын 1063 №-дээх ыстатыйатыгар олоҕуран, суукка үҥсэр бырааптаах. Кини ол сайабылыанньатыгар сүүйүүнү төлүүллэрин, лотереяны тэрийээччи дуогабары кэспитин түмүгэр кыайыылаах киһи албыннаппытын толуйалларыгар ирдэһэн суруйар.

Түмүк 

Кэлиҥҥи кэмҥэ социальнай ситимнэри дьон үҥсэр-харсар, атаҕастаппыт киһилэрин киэҥ эйгэҕэ таһааран саралыыр сир оҥоһуннулар. Куһаҕан сурах түргэнник тарҕанар, дьону албыннаабыт киһи, тэрилтэ аата-суола Instagram, батсаап ситиминэн күөрт ыт күлүүтүгэр, эриэн ыт элэгэр барар.

Урбаан эйгэтигэр күн ахсын саҥаттан-саҥа тэрилтэ аһыллар, сороҕо сабыллар. Холобур, «Сахаграндстрой» диэн тэрилтэни сабан баран саҥаны тэрийэн, эмиэ кими эрэ албыннаан баран, моҥкуруут ыытан кэбиһиэхтэрэ. Оччоҕуна тугу булан ылыаххыный?

Онон, чааһынай дьиэ, сир учаастагын сүүйбүт Валерий Гаврильев, спортсмен Айаал Лазарев уталыппакка Борокуратуураҕа, эбэтэр нолуогабай уоргаҥҥа сайабылыанньа суруйуохтарын наада. Сууттаһан даҕаны, сабыллыбыт тэрилтэттэн тугу ыга үктээн ылаары диэххит даҕаны, баҕар, хас да киһини албыннаабыт тэрилтэ аатын уларытан, туох да буолбатаҕын курдук үлэлии-хамсыы олороро буолуо. Биир тэрилтэ аатын хаста уларыппыта, хас тэрилтэни аспыта, саппыта нолуогабай уорган реестригэр ырылыччы көстө сылдьар. Ыстараап төлөөччү дааннайа итиннэ кэлэн түмүллэр.

Марианна ТЫРТЫКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0