Экология министиэристибэтэ Алдан өрүскэ ньиэп тохтубутун бэрэбиэркэлиир

От ыйын 22 күнүгэр СӨ Экология, айылҕаны туһаныы уонна ойуур хаһаайыстыбатын министиэристибэтигэр Таатта улууһугар Алдан өрүс баһыттан 240 км. сиргэ ньиэп тохтубутун туһунан иһитиннэрии киирбит. Ону чуолкайдаары Айылҕа харыстабылын Тааттатааҕы инспекция үлэһиттэрэ Уус-Тааттаҕа Булуҥ нэһилиэгин баһылыгын В.Ю. Борисовы кытта сүүрүк хоту өрүс туругун чинчийэ Хара-Алдаҥҥа тиийбиттэр.

edersaas.ru

Бараайы өрүс диэки хара ньамаҕы көрөн, онтон ууну ылан лабораторияҕа ыыппыттар. Кинилэр 200 кв. м. иэннээх сиргэ ууга хара ньамах уста сылдьарын көрбүттэр, кытылга сытар таастар итинтэн сылтаан эмиэ хараарбыттара, киртийбиттэрэ  биллибит.

Төннөн иһэн Уус-Таатта ньиэби харайар ыскалаатыттан сүүрүк үөһэ диэки сиригэр өрүс тааһа 100 м. усталаах сиргэ хара ньамаҕынан бүрүллүбүтүн бэлиэтии көрөн, ууну чинчийэн көрүүгэ ылбыттар.

Бэрэбиэркэ түмүгүнэн ньиэп бородууктата Булуҥ нэһилиэгиттэн үөһэ тохтубута этиллибит. Билигин буруйу оҥорбут дьону ирдэһии үлэтэ бара турар. Ол туһунан СӨ Экологияҕа министиэристибэтин пресс-сулууспата иһитиннэрэр.

Марианна Тыртыкова, edersaas.ru