Алдан өрүскэ оҥочо түҥнэһиннэ

Ааптар: 
Бөлөххө киир:

Алтынньы 16 күнүгэр Томпо улууһугар Алдан өрүскэ тоҕус киһини тиэйэн испит мотуордаах оҥочо түҥнэһиннэ. Биэс киһи быыһаммыт, үс киһи суорума суолламмыт уонна биир киһи көстө илик. Ыксаллаах быһыы-майгы министиэристибэтэ биллэрэринэн, оҥочоҕо баар дьон бары Томпо улууһун Кириэс Халдьаайы нэһилиэгин олохтоохторо.

Тоҕус киһилээх «Wellboat-45М» оҥочо Кэскил нэһилиэгиттэн Кириэс Халдьаайыга айаннаан испит. Оҥочо Мэҥэ Алдан таһыгар кэлэн түҥнэстибит. Саахалга түбэспит дьоҥҥо психологическай көмө оҥорор сыаллаах Томпо улууһун дьаһалтата психолог үлэтин тэрийдэ. Үс өлбүт дьону муоргаҕа илдьибиттэр.

Билигин сүппүт дьахтары көрдөөһүн үлэтэ ыытыллар. Олохтоох нэһилиэнньэ уонна Мэҥэ Алдан нэһилиэгин дьаһалтатын үлэһиттэрэ Алдан өрүс уҥа кытылын бэрэбиэркэлииллэр. Саахал тахсыбыт сиригэр Хаандыгаттан силиэстийэни ыытар суһал бөлөх үлэлиир.

Санатан эттэххэ, кыра мотуордаах оҥочолор сырыылара алтынньы 10 күнүттэн тохтообута.

Дьон өлбүтүнэн сибээстээн, бэрэбиэркэ саҕаланна.

Николай Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0