Бэҕэһээ, тохсунньу 13 күнүгэр, “Халыма” айан суолун 26-с биэрэстэтигэр, Аллараа Бэстээх бөһүөлэгиттэн 5 биэрэстэлээх сиргэ, эмиэ киһи өлүүлээх дьулаан суол быһылаана таҕыста. Хонда H-RV мааркалаах массыына иннигэр айаннаан иһэр КамАЗ массыынаҕа кэтиллэн, икки киһи тыына быһынна.
Саха Өрөспүүбүлүкэтин Суолга куттал суох буолуутун иниспиэксийэтин управлениетын начаалынньыга Самсон Чупров быһаарарынан, бу суол быһылааныгар буруйдаах – Хонда массыынаны ыытан испит Чурапчы олохтооҕо. Эдэр киһи массыына ыытар быраабы икки ыйдааҕыта эрэ ылбыт уонна аҕатын массыынатын уларсан, Дьокуускайга бэйэтин наадатыгар киирэригэр таарыйа Чурапчыттан 9-туу мөһөөххө түөрт киһини ылбыт. Уол аҕата, элбэх сыл ыстаастаах киһи, “Индрайвер” сыһыарыы өҥөтүнэн туһанан, дьону тиэйэр дьарыктаах эбит.
Өлүү түбэлтэлээх, КамАЗ массыына Аллараа Бэстээхтэн барыыга айан суолун уҥа өттүгэр сытар күөлтэн уу баһан тахсан, бөһүөлэккэ айаннаан испит. Уруулга саҥардыы олорбут суоппар асфальт суолга киирээт, бугуһуйбуттуу үктээн кэбиспит быһыылаах уонна уопута суоҕуттан скороһын кыайан хонтуруоллаабакка, буруоҕа-тумаҥҥа балыйтаран, иннигэр иһэр улахан массыынаҕа кэтиллибит. Тиһэх түгэҥҥэ өйдөөн көрөн, туора тута сатаабыт эрээри, хаҥас өттүнэн улаханнык охсуллан, көлүөһэтэ крылотун кытта туллан аара хаалбыт, массыына бэйэтэ суолтан эһиллэн түҥнэстибит. Охсуута улахана бэрдиттэн иннигэр олорсон испит уол уонна кини кэннигэр олорбут киһи тута өлбүттэр. Суоппар уонна икки пассажир доргуйбуттар эрээри, тута балыыһаҕа илдьибиттэрин кэнниттэн улаханнык эчэйбэтэхтэрэ быһаарыллан, тахсыбыттар.
Биллэн турар, тыыннаах хаалбыттартан саамай улахан охсууну – уйулҕа эмсэҕэлээһинин массыына ыытан испит эдэр уол ыллаҕа. Түргэн, сэрэҕэ суох айан содулугар икки киһи тыына быһынна: 55 сааһыгар сылдьар, оҕолордоох, сиэннэрдээх, Чурапчыга мелиорация тэрилтэтигэр тырахтарыыһынан үлэлиир Дмитрий Андреев уонна 33 саастаах, үс кыра оҕолоох эдэр ыал аҕата, бэйэтэ аҥаардас ийэ соҕотох оҕото Олег Новгородов. “Индрайвер” хампаанньа ааспыт сыл бүтүүтүгэр аһымал фондатын тэринэргэ быһаарыы ылынан, б.дь. тохсунньу 1 күнүттэн Россия иһигэр маннык быһылааҥҥа түбэспит дьоҥҥо харчынан көмө оҥорорун туһунан иһитиннэрэр, чопчу бу түбэлтэҕэ быһаарсыы, чуолкайдаһыы кэнниттэн бигэргэннэҕинэ, өлбүттээхтэр дьиэ кэргэттэригэр 1-дии мөл. солкуобайы биэриэх буолар.
Ол гынан баран, ыал оҕотун, аҕатын, тапталлаах кэргэни, эрэллээх доҕору хайа даҕаны бэйэлээх халыҥ харчы солбуйбата биллэр. Биһиги бу тиэмэҕэ соторутааҕыта “Сахамедиа” төгүрүк остуолугар кэпсэтии тэрийэн, СИА сайтыгар (ким баҕалаах онлайн-биэриини эмиэ көрүөн сөп), “Эдэр саас” сайпытыгар уонна “Саха сирэ” хаһыакка (б.дь. тохсунньу 10 күнүгэр тахсыбыт “Көҥүлэ суох “көҥүл таксистар” ыстатыйаны булан ааҕыҥ) сырдаппыппыт. Ол кэнниттэн тута СӨ Суолга куттал суох буолуутун иниспиэксийэтин управлениетын начаалынньыгын солбуйааччы Александр Оросины ыҥыран, “Акцент” биэриигэ таһаарбыппыт. Туһааннаах сулууспалар ырыталларынан, суол быһылаана үксүгэр эппиэтинэһэ суох сыһыантан уонна түргэн, сэрэҕэ суох айантан тахсар. Өскөтүн ити “Индрайвер” таксиһа массыынаҕа саҥардыы олорбут уолугар уруулун итэҕэйэн-эрэнэн биэрбэтэх буоллун, маннык быһылаан тахсыа суохтаах этэ…
Өлбүттээхтэр дьиэ кэргэттэригэр дириҥ кутурҕаммытын биллэрэбит уонна бу күннэргэ эһиги дьиэҕитигэр түбүлээбит ыар хомолто атын ыаллары тумнарыгар баҕарабыт. Такси сакаастыаххыт иннинэ суоппара кимин-тугун, көҥүллээҕин, көҥүлэ суоҕун чуолкайдаһыҥ, докумуонун ирдээн көрүҥ. Ол эрэ кэнниттэн олорсуҥ. «Билэр киһим», «аймаҕым» диэн өйдөбүллэр дьоллоох айаны өссө мэктиэлээбэттэрин өйдүүргэ уолдьаста. Төһө даҕаны тиэтэйбит-ыксаабыт иһин, бу орто дойдуга олох биирдэ эрэ бэриллэр ээ. Суолга сэрэхтээхтик айаннааҥ, бэйэ-бэйэҕитин харыстааҥ!
Василий НИКИФОРОВ, «Саха сирэ» хаһыат, edersaas.ru