Тыа хаһаайыстыбатын миниистирэ Александр Атласов дуоһунаһыгар хаалла
Александр Атласов тыа хаһаайыстыбатын миниистиринэн хат ананна. Ил Түмэн дьокутааттара Ил Дархан Айсен Николаев киллэрбит кандидатуратын өйөөтүлэр.
Александр Павлович өр сылларга Нам улууһугар үлэлээбитэ. Үлэтин сопхуос оробуочайыттан саҕалаан баран улуус баһылыгар тиийэ үүнэн тахсыбыта. Хомустаах нэһилиэгин баһылыгынан үлэлии олорон, Кыһыл Сыырга эдэр ыалларга анаан микрооройуон туттарбыта. Онтон улуус баһылыгынан талыллан баран, тыа хаһаайыстыбатын эбийиэктэрин базаларын хаҥатыыга, производствоны сайыннарыыга, тыа хаһаайыстыбатын бородууксуйатын элбэтиигэ, үөрэх, доруобуйа харыстабылын эйгэлэригэр, култуураҕа, спорка сүрүн болҕомтотун уурбута. Тыа хаһаайыстыбатын миниистиринэн быйыл кулун тутарга анаммыта.
Ыспыраапка:
Атласов Александр Павлович
1965 с. бэс ыйын 5 күнүгэр Нам улууһун 1 Хомустаах нэһилиэгэр төрөөбүтэ;
1982-1983 сс. – “Нам” сопхуоска оробуочай;
1983-1985 сс. – Сэбиэскэй аармыйаҕа сулууспалаабыта;
1986-1992 сс. – Иркутскайдааҕы тыа хаһаайыстыбатын институтун устудьуона;
1992-1995 сс. – “Нам” үөрэтэр-производственнай хаһаайыстыбатыгар үлэлээбитэ;
1995-1998 сс. – Нам улууһун тыатын хаһаайыстыбатын управлениетын кылаабынай исписэлииһэ;
1998-1999 сс. – СӨ тыатын хаһаайыстыбатын министиэристибэтин кылаабынай исписэлииһэ;
1999-2005 сс. – СӨ тыатын хаһаайыстыбатын министиэристибэтин управлениетын начальнигын солбуйааччы;
2005-2013 сс. – Нам улууһун 1 Хомустаах нэһилиэгин баһылыга;
2013-2018 сс. – Нам улууһун баһылыга.
Аграфена КУЗЬМИНА, edersaas.ru