Ааспыт нэдиэлэҕэ Хаҥалас улууһугар, Нөмүгүгэ, массыынанан ыаһын оператордарын улуустааҕы күрэхтэһиилэрэ буолан ааста.
edersaas.ru
Күрэхтэһии арыллыытыгар улуус баһылыга Гаврил Алексеев, «Анаабыр алмаастара» АУо генеральнай дириэктэрэ Павел Маринычев итиэннэ тыа хаһаайыстыбатын министиэристибэтин Сүөһүнү иитиигэ уонна племенной үлэҕэ департаменын сүрүн исписэлииһэ Александра Петрова эҕэрдэ тылларын эттилэр.
Тыа хаһаайыстыбатын табаарын оҥорууга идэтийэр хаһаайыстыбалар: «Нөмүгү агрофирма», “Бөртө” сылгы собуота” ХЭУо-лар, “Хахсык”, “Самартай” кэпэрэтииптэр ыанньыксыттара, 12 киһи кыттан, ыыр аппараты ыһыыга-хомуйууга, ыаһыҥҥа уонна бастааҥҥы зотехническэй билиигэ тургутустулар.
Түмүккэ “Нөмүгү” агрофирма ыанньыксыта Александр Громов 100-тэн 99,97 баалы ылан, бастаата. Даҕатан эттэххэ, кини былырыын ыанныксыттар өрөспүүбүлүкэтээҕи күрэхтэһиилэригэр хотон, Бүтүн Арассыыйатааҕы күрэхтэһиигэ Саха сирин чиэһин көмүскээбитэ. Эмиэ бу агрофирматтан Мария Саввина 98,97 баалы ылан, иккис миэстэ буолла. Үһүс бириистээх миэстэҕэ «Бөртө» ыанньыксыта Анастасия Григорьева тигистэ.
Раиса СИБИРЯКОВА, “Саха сирэ” хаһыат, edersaas.ru