Дьокуускай куорат тэриллибитэ 386 сылыгар Арассыыйа эстрадатын артыыһа Александр Панайотов Ленин болуоссатыгар кэнсиэртээтэ.
Александр урукку уонна кэнники хит буолбут ырыаларын көрөөччүлэргэ бэлэхтээтэ. Кэнсиэри “Танцы” бырайыак үҥкүүһүттэрэ киэргэттилэр. Түмүккэ оҕолор хордарын кытары тахсан, “Здравствуй, Якутск” диэн ырыаны ыллаан, Дьокуускай олохтоохторун соһутта. Кини олус ыраас, лиричнэй, үрдүк куоластаах, үрдүк таһымнаах артыыс.
Төһө да ардахтаах-хаардаах, тымныы тыаллаах буоллар, дьон сөбүлүүр артыыстарын кэнсиэригэр халыҥнык таҥнан баран, хото кэлбиттэр. Көрөөччүлэр сыана уотун-күөһүн, тыаһын-ууһун үчүгэйдик оҥорбуттарын бэлиэтээтилэр.
Александр Панайотов 2003 с. “Народный артист” диэн телебырайыакка кыттан, киэҥник биллибитэ. Кэлин “Голос” биэриигэ 2-с миэстэни ылбыта. “Стань звездой” биэриигэ финалга тахсыбыта.
Кини 1984 с. Запорожьеҕа төрөөбүтэ. Кыра эрдэҕиттэн ыллыыр. Элбэх музыкальнай бириэмийэлэр лауреаттара. Холобур, “Событие года” бириэмийэҕэ «Самый востребованный артист года» ааты (2017), Fashion People Awards-2018 «Певец года” ааты, о.д.а. ылбыта.
Арассыыйа эстрадатын биллэр артыыһа болуоссакка босхо кэнсиэртээбитэ – куорат төрөөбүт күнүгэр олохтоохторго дьоһуннаах бэлэх буолла.
Ангелина Васильева, “Саха сирэ” хаһыат, edersaas.ru