Госдуума дьокутаата Александр Сидякин өлүүлэһэн тутууга албыннаппыт дьону кытта көрүстэ
Госдума дьокутаата, «Биир ньыгыл Арассыыйа» баартыйа өлүүлэһэн тутууга киирэн баран албыннаппыт, харчыларын уурдаран угаайыга түбэспит дьон интэриэһин көмүскүүр бөлөх салайааччыта Александр Сидякин Дьокуускайга кэлэ сылдьан, тутуллан иһэн тохтоон хаалбыт тутуулары хайдах бүтэриэххэ сөбүн дьүүллэстэ. Кини ипотека харчытын уган баран хаһыс да сылларын дьиэлэрин күлүүһүн ыла илик дьону кытта көрсөн кэпсэттэ.
edersaas.ru
Дзержинскай уулусса 16/4 уонна Богатырев уулусса быһа охсуһууларыгар турар килэйбит-халайбыт араҕас өстүөкүлэ балкуоннаах дьиэ 2013 с. тутуллан бу күһүн саҥа үлэҕэ киирдэ. Лииптэрэ өссө даҕаны холбоно илик эрээри, биэс сыл тухары саҥа дьиэҕэ көһөллөрүн күүппүт дьон үөрүүлэриттэн онно улаханнык кыһамматтар.
Розалия Дыдорова курдук дьон баар буолан, кинилэр сүүрэн-көтөн, туруорсан, «Ормикс» ХЭТ син дьиэни туттарда. Александр Сидякин: «Маннык түмсүүлээх дьон хамсаабат да тааһы сыҕарытар күүстээхтэр», — диэн эттэ. Розалия Степановна үөрүүтүттэн дьиэтигэр ыҥыран киллэрэн, балык бөрүөгүнэн күндүлээтэ. Биир хостоох кыбартыыра балкуона бүтүн хос саҕа киэҥин, үөһэттэн куорат ытыска уурбут курдук көстөрүн кэрэхсии көрдүбүт. Аһыыр, суунар хос эмиэ киэҥ-куоҥ, бэрт табыгастаах гына оҥоһуллубут.
Иккис эбийиэккэ — ХИФУ 66 уопсайын утары Каландаришвили уулуссаҕа тиийбиппит, 2013 с. тутуллуохтаах дьиэ сыбаайата эрэ турар. Аттыгар кирпииччэ өҥнөөх, маҥан балкуоннаах бэрт кыраһыабай көрүҥнээх, Михаил Мэрикянов туппут дьиэтин бастакы уочарата дьэндэйэн турар. Саха-ипотечнай ааҕыныстыба уонна «Хотугу тутуу хампаанньата» ХЭТ дириэктэрэ Мэрикянов өлүүлэһэн тутууга дьон харчытын хомуйан баран иккис уочаратын бүтэрбэтэхтэр. Дьон ипотекаларын төлүүллэр уонна хаһыс да сылларын дьиэ куортамнаан олороллор, тутуулара хаһан бүтэрэ биллибэт.
Биллэрин курдук, Мээрикээнэпкэ холуобунай дьыала көбүтүллүбүтэ эрээри, тэрилтэтэ моҥкуруут баран, тутууну бүтэрэр кыаҕа суох. Атын тутааччыны булуохтарын, «Хотугу тутуу хампаанньата» ХЭТ саҕалаабыт тутуута 22 мөл. солк. иэстээх. Итинник улахан иэһи бэйэтигэр ылыныан биир да тутааччы баҕарбат.
Госдуума дьокутаата Александр Сидякины кытта быраҕыллыбыт тутуу тиэргэнигэр көрсүһүүгэ кэлбит дьон хаһыс да сылларын ипотеканы төлүүллэрин, өссө дьиэ куортамныылларын, кинилэр ортолоругар элбэх оҕолоох ийэлэр, кырдьаҕастар баалларын эттилэр. Өлүүлэһэн тутууга укпут харчыларын дьиэтин иэнигэр эппиэттэһэр атын дьиэҕэ кыбартыыра биэрэллэригэр көрдөстүлэр. Хаһыс да сылларын саҥа дьиэҕэ көһөн киирэллэрин кэтэһэ сатаан баран, үс киһи олохтон туораабытын аҕыннылар.
Дойду тэбэр кииниттэн кэлбит дьокутаат дьону кыһалҕалаах кэмҥэ быраҕар сатамматын, Бырабыыталыстыба мунньаҕар өлүүлэһэн тутууга албыҥҥа киирэн биэрбит дьон интэриэһин көмүскүүргэ үүтү-хайаҕаһы барытын толкуйдаан, боппуруоһу быһаарыахпыт диэтэ.
Марианна Тыртыкова, «Саха сирэ», edersaas.ru