Александр Жирков – Кыргызстаҥҥа “Сыл бастыҥ киһитэ”!

Бөлөххө киир:

Кыргызстан Өрөспүүбүлүкэтин  «Жетиген» диэн бөдөҥ уопсастыбаннай-политическай сурунаалын редкэллиэгийэтин быһаарыытынан, Саха Өрөспүүбүлүкэтин бэһис ыҥырыылаах Судаарыстыбаннай Мунньаҕын (Ил Түмэнин) Бэрэссэдээтэлэ Александр Жирков “Сыл бастыҥ киһитэ-2018” ааты ылла.


Кыргызстан литературнай уонна айар уопсастыбаннаһын маннык үрдүк билиниитин Александр Жирков норуоттар икки ардыларынааҕы култуурунай-гуманитарнай бииргэ үлэлэһиини бөҕөргөтүүгэ киллэрбит сүҥкэн кылаатын, сыралаах үлэтин иһин ылар диэн суруллубут быһаарыыга. Быйыл төрөөбүтэ 90 сыла ЮНЕСКО-нан бэлиэтэнэр  улуу гуманист-суруйааччы Чингиз Айтматов айымньыларын тарҕатыыга, аан дойду норуоттарын эпическэй нэһилиэстибэлэрин араҥаччылааһыҥҥа уонна пропагандалааһыҥҥа итиэннэ 2017 сыл бэс ыйыгар Саха Өрөспүүбүлүкэтигэр Кыргызстан Өрөспүүбүлүкэтин Литературатын уонна искусствотын күннэрин үрдүк таһымҥа ыытыыга Александр Николаевич Жирков киллэрбит кылаата тоһоҕолоон бэлиэтэнэр.

Биллэрин курдук, Александр Жирков көҕүлээһининэн, биһиги өрөспүүбүлүкэбитигэр 2014 сылтан саҕалаан, «Аан дойду норуоттарын эпическэй пааматынньыктара» сиэрийэ тахсар. Ол курдук, саха тылыгар тылбаастанан кыргыз омук эпоһа «Манаас»,  Алтай  эпоһа «Маадай Хара», башкирдар эпостара «Ураал баатыр» күн сирин көрбүттэрэ. Оттон тыва эпоһа «Кунан Хара» бэчээккэ тахсарга бэлэмнэнэр. Сэргэстэһиннэри, бу өрөспүүбүлүкэлэргэ саха героическай эпоһа «Ньургун Боотур» тылбаастанан бэчээккэ тахсар.

Оттон саха норуодунай суруйааччыта Сэмэн Руфов Александр Жирков 2016 сыллаахха Чингиз Айтматов «Пегий пес, бегущий краем моря» сэһэнин сахалыы тылбаастаабытын «Саха тылбаастыыр култууратыгар бөдөҥ кылаатынан» сыаналаабыта.

Александр Николаевич көҕүлээһининэн, Литература уонна искусство күннэрин чэрчитинэн, саха суруйааччыларын, бэйиэттэрин айымньылара    кыргызтыы тылбаастанан (хомуйан оҥорооччулар – “Саха сирин суруйааччылара” ассоциация бэрэссэдээтэлэ Олег Сидоров, «Күрүлгэн» сурунаал эрэдээктэрэ Афанасий Гуринов о.д.а.), «Ала Тоо» уонна «Жетиген» сурунаалларга бэчээттэммиттэрэ, Максим Аммосов Киргизиятааҕы сылларын туһунан  документальнай киинэни оҥорууга “Кыргызфильм” уонна “Саха” НКИХ холбоһуктаах бырайыактара олоххо киллэриллибитэ.

Александр Жирков Кыргыз Өрөспүүбүлүкэтин айар уопсастыбаннаһын  бу курдук үрдүк билиниитин омук судаарыстыбаларын гражданнарыттан аан бастакынан ылар чиэстэннэ.

Ил Түмэн Бастакы вице-спикерэ Александр Жирков ахсынньы 16 күнүгэр Бишкек куоракка номинацияны туттарыыга ыҥырылынна.

 Ил Тумэн Пресс-сулууспата.

Бэчээккэ бэлэмнээтэ Татьяна Маркова.

+1
0
+1
0
+1
0
+1
0
+1
0
+1
0
+1
0