Былырыыҥҥа диэри Дьокуускайга олорбут Алексей Захаров дойду ахтылҕана баһыйан, кэргэнин уонна оҕолорун илдьэ Эмискэ көһөн тахсыбыта.
Тыа сирин киһитэ икки харытыгар күүстээх, төбөтө толкуйдаах буоллаҕына, хаһан да үлэтэ суох быар куустан олорбот. Маныаха эбии өрөспүүбүлүкэ салалтата уонна бырабыыталыстыбата тыа хаһаайыстыбатын, тыа сирин кэлим сайыннарыыга олус улахан болҕомтону уураллара санааны кынаттыыр. Онон, Алексей өр толкуйдуу барбакка, кыракый кыыһа Катюша аатын биэрэн, бааһынай хаһаайыстыба тэринэргэ сананан үлэлээн эрэр. Тыа хаһаайыстыбатын уонна ас—үөл бэлиитикэтин министиэристибэтин иһинэн үлэтин саҥа саҕалыыр бааһынайдарга анаммыт бырагыраама граныгар анньыһан көрбүтэ да, докумуона ситэтэ суох буолан, быйыл кыайан тиксибэтэ. Ол да буоллар санааны түһэрбэт, эһиил өссө кыттар былааннаах. Онно кыайарга бары олук ууруллубут курдук: хотонноох, дьонун кытта кыттыһан сүүрбэччэ сүөһүлээх, эһиил өссө элбэтэр соруктаах. Быһата, эдэр киһи үлэлииргэ—хамсыырга бэлэм, үлэлии да сылдьар. Билигин аҕатын, Дмитрий Васильевиһы, кытары оттоон тигинэтэр.
— Курааннаан, от быдан убаҕас, хата, урукку өттүгэр уу ылбыт сирдэрэ куураннар оттоттулар, күһүн хойукка диэри оттуохпут. Ааспыт сылтан хаалбыт кур оппут баар. Онон сүөһүлэрбитин сыл таһаарар оту булунуохпут. Үүккэ былааммыт икки туонна, күҥҥэ 55 киилэни туттарабыт, сыата да куһаҕана суох, 3,6-3,7 бырыһыан, — диэн кэпсиир Алексей.
Кинилэр тастарыгар аймахтара, «Баһылайчаан» бааһынай хаһаайыстыба баһылыга Егор Васильевич күөл кытыытын оҕустара сылдьар. Кини хаһаайыстыбата улахан, чааһынай ыаллартан сүөһүнү эмиэ хомуйан көрөр. Онон барыта 84 сүөһүлээх, ол иһигэр 36 ыанар ынахтаах. Сыл тахсар отун хааччынарга эрэллээх. От үүнүүтүн куһаҕан диир кыах суох диир. Окко «абааһы мунньаҕын» иннинэ, от ыйын 10 күнүгэр, киирбит, билиҥҥитэ 28 туонна кэбиһиилээх. Отчут—масчыт дьон үчүгэйдик аһаатаҕына эрэ үлэтэ таһаарыылаах буолара өйдөнөр. Захаровтарга убайдара, ИДьМ бэтэрээнэ, астаапкаҕа олорор полковник, 75 саастаах Петр Егорович отууга асчытынан сылдьар эбит. Онон букатын да байыаннайдыы дьон буолан биэрдилэр.
Ити курдук, Захаровтар «Баһылайчаан» уонна атаҕар саҥа үктэнэн эрэр «Катюша» бааһынай хаһаайыстыбалара сүөһүлэрин—сылгыларын сыл тахсар отун хааччынар туһугар күүстэрин түмэн оттуу сылдьаллар. Кинилэр былааннара туоларыгар бигэ эрэл баар.
Амматтан Наталья БУБЯКИНА, “Саха сирэ” хаһыат, edersaas.ru сайтка анаан.