СӨ Бырабыыталыстыба бэрэссэдээтэлин бастакы солбуйааччы Алексей Колодезников Мэҥэ Хаҥаласка Ороссолуодаҕа халаан уутугар эмсэҕэлээбиттэри кытары көрүстэ. Кини этэринэн, эбэ уутун таһыма бу күннэргэ салгыы түһүөхтээх.
Бүгүн сарсыарда Ороссолуодаҕа халаан уута 216 киһи олорор 87 тиэргэнин ылбыт. Кыһалҕаҕа кыһарыйтарбыттар быстах олорор пууннара тэриллибит эрээри, дьон аймахтарынан, билэр дьоннорунан тарҕаспыттар.
Нэһилиэнньэни кытары көрсүһүүгэ Алексей Колодезников бу күннэргэ халаан уутун таһыма түһүөҕэ диэн эттэ.
«Бүгүн Ороссолуода олохтоохторун кытары көрүстүбүт. Халаан уута нэһилиэк намыһах сирдэригэр турар дьиэлэри ылбыт. Дьон-сэргэ ордук айаны-сырыыны, уоту-күөһү, сылааһынан хааччыллыыны, материальнай көмөнү ыйыталаһаллар», — диэтэ СИА Алексей Колодезников.
Ону сэргэ, дьиэни-уоту тутуу туһунан ордук токкоолоспуттар. Тоҕо диэтэххэ, билигин бөһүөлэк намыһах сирдэригэр сүрүннээн кыаммат дьон хаалбыттар. «Биллэн турар, билигин ити боппуруоһу быһаарары толкуйдуубут», — диэн эбэн эттэ.
Ольга СТАРОСТИНА, СИА.