Бэҕэһээ Ил Дархан э.т. Айсен Николаев бырабыыталыстыба бэрэссэдээтэлин солбуйааччылары анаата. Бастакы вице-премьер эбээһинэһин толорооччунан Алексей Стручков буолла. Кини бу дуоһунаска үсүһүн ананыыта.
Алексей Александрович үлэтин Дьокуускай куорат дьаһалтатын исписэлииһинэн саҕалаабыта. Бырабыыталыстыбаҕа үлэтэ 1998 сылтан саҕаламмыта. Кини бу сыл Олох-дьаһах, коммунальнай хаһаайыстыба министиэристибэтигэр управление начаалынньыгынан ананан кэлбитэ. 2000 с. Экэниэмикэ министиэристибэтигэр департамент начаалынньыгынан, 2002 с. бырамыысыланнас миниистирин солбуйааччынан, онтон бастакы солбуйааччынан үлэлээбитэ. 2005 сыллаахха бырамыысыланнас миниистиринэн, 2007 с. экэниэмикэ миниистиринэн ананан үлэлээбитэ.
2010 с. бэс ыйын 19 күнүгэр бырабыыталыстыба бэрэссэдээтэлин бастакы солбуйааччынан анаммыта. Бу үлэлиир сылларыгар экэниэмикэ, бырамыысыланнас, нолуок, инвестиция, судаарыстыбаннай бырагыраамалары олоххо киллэрии, муниципальнай тэриллиилэри кытары үлэлэһии, биисинэс, атыы-эргиэн, статистика боппуруостарыгар үлэлэспитэ.
2013 с. Москваҕа Саха сирин бэрэстэбиитэлинэн үлэлээн баран, 2016 с. бастакы вице-премьер-экэниэмикэ миниистиринэн анаммыта. Эмиэ үп-харчы, экэниэмикэ боппуруостарыгар үлэлээбитэ.
Былырыын кини “Якутскэнерго” хампаанньа генеральнай дириэктэрин солбуйааччынан ананан барбыта. Бу күннэргэ Ил Дархан э.т. Айсен Николаев кинини бастакы вице-премьер эбээһинэһин толорорго ыҥырда. Алексей Стручков саҥа дуоһунаһыгар үп-харчы, экэниэмикэ боппуруостарынан дьарыктаныаҕа.
Ыспыраапка: Стручков Алексей Александрович 1967 с. от ыйын 30 күнүгэр Мэҥэ Хаҥалас улууһун Төҥүлү нэһилиэгэр төрөөбүтэ. 1992 с. В.В.Куйбышев аатынан Новосибирскайдааҕы инженернэй институту, кэлин РФ бырабыыталыстыбатын иһинэн үлэлиир Үп академиятын үөрэнэн бүтэрбитэ.
Аграфена КУЗЬМИНА, “Саха сирэ” хаһыат, edersaas.ru