Бүгүн Тыа хаһаайыстыбатын академиятын устудьуоннарын иккис бөлөҕө Казахстан Өрөспүүбүлүкэтигэр үөрэнэ көттө.
edersaas.ru
Икки устудьуон анал куонкуруһу ааһан, Казахстаннааҕы Сакен Сейфуллин аатынан агротехническэй университекка, академия түөрт устудьуона Манаш Козыбаев аатынан Хотугу-Казахстаннааҕы государственнай университекка биир семестры быһа үөрэниэхтэрэ.
Төрөөбүт тыл күнүнэн сибээстээн академия устудьуона Денис Оконешников кэскиллээх айаҥҥа турунаары турар үөлээннээхтэрин саха сиэрин-туомун тутуһан, алгыһынан атаарда:
Аҕыс иилээх-саҕалаах
Атааннаах-мөҥүөннээх
Айгыр-силик айылгылаах
Арыынан аллар
Араҕас далбардаах
Аан ийэ дойдум
Аналлаах туонатыгар
Аҕыс сардаҥалаах
Аламай маҥан күммүт
Арылыйа тахсыыта
Устар ууну сомоҕолуур,
Утаппыты ханнарар,
Уостубуту төнүннэрэр,
Уолбуту толорор
Уран-уус тылбынан
Уһун суолга айанныыр
Үтүө доҕотторбун
Үмүөрүччү тутан
Үтүө тылынан
Алҕаатаҕым буоллун!
Сылдьар сырыыгыт
Ситиһиилээх буоллун,
Айанныыр суолгут
Алгыстаах буоллун,
Көтөр кэмҥит
Көмүскэллээх буоллун,
Тиийэр сиргит
Табыллыылаах буолун,
Илиҥ өттүгүт
Ибири билбэтин,
Кэлиҥ өттүгүт
Кэбири билбэтин,
Сэттэ Иэйэхсиккит сэргэстэстин
Аҕыс Айыыһыккыт аргыстастыҥ,
Санааҕытынан сандааран
Ситиһиигитинэн кынаттанан,
Саха буолан сандаарыҥ
Урааҥхай буолан улуутуйун!
Дом!
Денис Оконешников бүгүн Саха тылын уонна суругун-бичигин күнүгэр Суорун Омоллоон аатынан тыйаатырга үгэс буолбут оһуохайга кыттыаҕа.
Академия уопсастыбаннай олоҕор актыыбынайдык кыттар эдэр киһи фольклорунан оскуола сааһыттан дьарыктанар. Үөрэнэр бөлөҕөр староста буолан, тылыгар турунар, ылыммыт соругун кэмигэр толорор, эппиэтинэстээх устудьуон, эдэр дьиэ кэргэн аҕата «Эр киһи киэҥ көҕүстээх» диэн санаанан салайтарар. Эдэр киһи үөрэҕин бүтэрдэҕинэ төрөөбүт дойдутугар Мэҥэ Хаҥалас улууһугар төннөн үлэлиир санаалаах.
Ыччаттарбыт бу курдук сахалыы тыыннаах буолалларын тухары, төрөөбүт ийэ тылбыт, саха норуотун суруга-бичигэ өрүү сайдар кэскиллээх!
Елена ПОТОЦКАЯ, «Саха сирэ» хаһыат, edersaas.ru