Алимены төлөөбөт буолуу — сааттаах быһыы

Ааптар: 
Бөлөххө киир:

Соторутааҕыта Мииринэй оройуонугар мировой суут алименын төлүүртэн куотуммут киһиэхэ уураах таһаарбыта.

edersaas.ru

Бу аҕаҕа РФ Суут бириистэптэрин федеральнай сулууспатын Саха сиринээҕи управлениетын Мииринэйдээҕи салаатын бириистэптэрэ толоруллар дьыала (“исполнительное производство”) тэрийбиттэрэ. Иэстээҕин санаа-баттык оҥостубакка, төлөөбөккө сылдьан, уһатан-кэҥэтэн, онто кэлин тиһэҕэр, 350 тыһ. солк. кэриҥэ буолбут. Оҕотугар алименын төлөөбөтүн ааһан, тугунан да көмөлөспөт эбит, Дьарыктаах буолуу киинигэр учуокка турбатах.

Инньэ гынан, толорооччу суут бириистэбэ киниэхэ РФ Административнай кодексатын 5.35.1 ыстатыйанан боротокуол толорбут. Мировой суут эппиэтинэһэ суох аҕаны административнай сокуону кэһиигэ буруйдааҕынан билинэн, 20 чаас булгуччулаах үлэҕэ уурбут.

Ити этиллибитин курдук, алимены төлөттөрүүнү ирдэһии — суут бириистэптэрин сүрүн соруктарыттан биирдэстэрэ. Ол курдук, управление пресс-сулууспата иһитиннэрбитинэн, бу сыл 10 ыйын түмүгүнэн, бириистэптэр оҕолор тустарыгар 62 мөл. солк. иэһи ирдэһэн төлөттөрбүттэр.

Бу сыл саҕаланыаҕыттан барыта 11 тыһыынчаттан тахса маннык толоруллар дьыала тэриллибит (ааспыт сыл бу кэминээҕэр ити 1500-нан элбэх). Ону тэҥэ, алиментщиктары кытта үлэ көдьүүһэ эмиэ көстөр — 6 тыһ. тахса дьыала түмүктэммит. Соһуйуоҥ иһин, ити 11 тыһыынчаттан 1300 кэриҥэ – дьахтар аймахха тэриллибит. Алиментщик орто сааһа – 34.

Бэлиэтээн эттэххэ, алимены төлөөһүҥҥэ иэстээх киһи Российскай Федерация таһыгар тахсар итиэннэ массыына ыытар бырааба хааччахтанар. Хас алтыс дьыалаҕа иэстээх төрөппүт баайыттан-малыттан (“арест”) матан турар.

Быһааран буоллахха, алименын төлөөбөт, төлүүртэн куотунар, дохуотун дьиҥнээх сууматын кистиир биитэр соруйан аччатан көрдөрөр киһи административнай эбэтэр холуобунай эппиэккэ тардыллар.

Ол курдук, суут бириистэбэ икки сэрэтии оҥорбутун кэнниттэн, бу киһи син биир төлүүр санаата суох буоллаҕына, административнай  дьыалаҕа эриллэр.

Оттон иэһин төлөөбөтөҕө түөрт ыйтан ордубут буоллаҕына, киниэхэ РФ Холуобунай кодексатын 157-с ыстатыйатынан (“Оҕону эбэтэр үлэлиир кыаҕа суох буолбут төрөппүтү иитэргэ анаммыт харчыны төлүүртэн өһөөн туран куотунуу”) холуобунай дьыала тэриллэр. Бу сыл 10 ыйыгар оннук 220-тэн тахса холуобунай дьыала тэриллибититтэн, 50 киһи, дьэ, иэстэрин төлүүргэ ылсыбыттар.

Манна даҕатан эттэххэ, алимены төлөттөрүүгэ сүрүн кыһалҕаларынан, харгыстарынан иэстээх аҕа үлэтэ, дохуот киллэринэр дьарыга, түптээн үлэлиир сирэ суоҕа, үлэ миэстэтин сарбыйыыга түбэһэн ытыһын соттон хаалыыта, үлэлиэн баҕарбытын да иһин үлэ көстөн биэрбэтэ, бэйэтэ сүрэҕэ суоҕуттан көрдүү да сатаабата, куһаҕан дьаллыктары батыһан, огдолуйбут олохтооҕо буолаллар.

 Ол эрэн, хаан-уруу, бэйэлээх бэйэтин оҕото киһилии аһаабакка-таҥныбакка, тиийбэт тирии, тарпат тараһа курдук олохтонон, оҕолортон эрэ итэҕэс сананан улаатара – хас биирдии иэстээх ийэ-аҕа суобастарыгар. Өйдөөҥ, алимены төлөөбөт буолуу – сааттаах быһыы!

Вера Макарова, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0