Оҕолорун иитиигэ көмөлөспөт 31 саастаах эппиэтинэһэ суох аҕаҕа суут уурааҕа тахсыбытын туһунан СӨ Борокуратууратын пресс-сулууспата иһитиннэрдэ.
Биллэрин курдук, сокуоннай саастарын ситэ илик оҕолоругар алименын төлөөбөт төрөппүккэ бастаан сэрэтии оҥороллор. Оттон төлүүртэн куотунар буоллаҕына, административнай дьыала тэриллэр, онтон онно да өйдөөбөтөҕүнэ — холуобунай.
Ол курдук, 2017 сыл тохсунньу ыйыгар бу аҕаҕа суут бириистэптэрэ толоруллар дьыала («исполнительное производство «) тэрийбиттэр. 3 саастаах оҕотугар алимент төлүүрүн туһугар.
Ити иннинэ, 2016 сыл атырдьах ыйыгар, бу киһи алименын төлөөбөккө, административнай эппиэккэ тардыллан, 80 чаас булгуччулаах үлэҕэ ууруллубут.
Онтон 2017 сыл тохсунньутугар уонна балаҕан ыйыгар РФ Холуобунай кодексатын 157-с ыстатыйатынан сууттанан, 10 ыйга көҥүлэ быһыллара усулуобунайынан ааҕыллан, 1 сыл тургутар болдьоххо ууруллубут.
Ол эрэн, алименын син биир төлүүр-төлөөбөт сылдьан, ол түмүгэр, 55 тыһ. солк. иэстэммит.
Инньэ гынан, суут усулуобунай миэрэтин уларытан, 11 ыйга көс-холуонньаҕа көҥүлүн быһарга уурбут. Буруйдааҕы суут саалатыттан тутан барбыттар.
Быһаарар буоллахха, алименын төлөөбөт, төлүүртэн куотунар, дохуотун дьиҥнээх сууматын кистиир биитэр соруйан аччатан көрдөрөр киһи административнай эбэтэр холуобунай эппиэккэ тардыллар. Оттон суут бириистэбэ икки сэрэтии оҥорбутун кэнниттэн, бу киһи син биир төлүүр санаата суох буоллаҕына, административнай дьыалаҕа эриллэр.
Оттон иэһин төлөөбөтөҕө түөрт ыйтан ордубут буоллаҕына, киниэхэ РФ Холуобунай кодексатын 157-с ыстатыйатынан (“Оҕону эбэтэр үлэлиир кыаҕа суох буолбут төрөппүтү иитэргэ анаммыт харчыны төлүүртэн өһөөн туран куотунуу”) холуобунай дьыала тэриллэр. Онтон сууттанан баран, суут уурааҕын толорботоҕуна, көҥүлэ быһыллыан сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн