Балаҕан ыйын 19-21 күннэригэр Словакия Трнава куоратыгар буолар 21-гэр диэри саастаах кыргыттар ортолоругар көҥүл тустууга аан дойдуга бастыыр иһин күрэхтэһиигэ кыттар дойду сүүмэрдэммит хамаандатын састаабыгар Хотугулуу-Илиҥҥи университет устудьуона, спорт үрдүкү маастарыстыба оскуолатын иииллээччитэ Алина Касымова киллэрилиннэ.
Алина быйыл саас кыргыттарга Арассыыйа күрэхтэһиитин чаҕылхайдык кыайан баран, Римҥэ ыытыллыбыт Европаҕа бастыыр иһин күрэхтэһиигэ тиийэн бэһис буолбута. Ол үрдүнэн дойду сүүмэрдэммит хамаандатын тириэньэрдэрэ Алинаны аан дойду түһүлгэтигэр туһуннарарга быһаардылар.
Пермь уобалаһыттан төрүттээх спорт маастара кадеттарга Европа икки төгүллээх чөмпүйүөнүнэн, саастыылаахтарын ортотугар аан дойду 2016, 2017 сыллардааҕы күрэхтэһитин кыайыылааҕынан, улахан дьоҥҥо дойду чөмпүйэнээтин боруонса призерунан буолар. Быйыл Д.Г.Миндиашвили аатынан Тустуу академиятын бирииһигэр Бүтүн Арассыыйатааҕы уонна Турцияҕа ыытыллыбыт норуоттар икки ардыларынааҕы турнирдарга бастаталаабыта.
Алина билигин Арассыыйа үтүөлээх тириэньэрэ Солтан Засеев уонна Саха Өрсөпүүбүлүкэтин үтүөлээх тириэньэрэ Владимир Кириллин салалталарынан эрчиллэр.
Роман ПОПОВ, edersaas.ru
Хаартыска Интэриниэттэн ылылынна.