Мэҥэ Хаҥалас улууһун Аллараа Бэстээҕэр Саха сиригэр 18-с бизнес-инкубатор аһылынна. edersaas.ru
Бу улахан социальнай эбийиэк Аллараа Бэстээх улуус киинэ 10 сыллаах үбүлүөйүгэр күндү бэлэҕинэн буолла. Бүгүҥҥү күҥҥэ саҥа үлэҕэ киирбит инкубатор 14 резиденнээх. Манна өссө 25 бэйэ дьылатын саҕалаан эрэр предприниматель үлэлии кэлиэҕэ. Маны таһынан инкубатор салалтата улуус нэһилиэктэрин кытта интернет, социальнай ситим нөҥүө үлэлиир былааннаах. Онон быһа холуйан бизнес-инкубатор урбаан эйгэтигэр саҥа тахсан эрэр 70-ча предприниматель үлэтин сүрүннүөҕэ.
Эбийэги туппут «Авангард» ХЭТ генеральнай дириэктэрэ Николай Шишигин бизнес-инкубатор салайааччытыгар символическай күлүүһүн туттарбытын кэнниттэн Николай Скрябин тэрилтэтигэр экскурсия ыытта. Манна конференц-саала, уопут атастаһар киин, урбаанньыттар табаардарын тиэйэр массыыналарын гарааһа, кафе курдук бары усулуобуйа учуоттаммыт.
Улуус дьаһалтатын баһылыга Николай Старостин бу суолталаах тэрилтэ оскуолалар бизнес-инкубатордарын кытта ыкса сибээһи олохтууругар мэктиэлээтэ.
— Үүнэр көлүөнэ аныгы олох тэтимигэр сөп түбэһэн, дьоҕус бизнеһи баһылаан, улуус социальнай-экэнэмиичэскэй сайдыытыгар бэйэлэрин кылааттарын киллэрэллэрин туһугар үлэ хайысхатын торумнуур сорук турар, — диэн бэлиэтээтэ баһылык.
Олохтоох урбаанньыттары өйүүр инкубатордар Дьокуускайга, Нерюнгрига, Ньурбаҕа, Хаандыгаҕа, Бүлүүгэ, Алдаҥҥа, Намҥа, Балыктаахха, Үрүҥ-Хайаҕа, Дириҥҥэ, Уус Майаҕа, Сунтаарга, Чокурдаахха, Ой нэһилиэгэр, Ытык-Күөлгэ, Бердьигэстээххэ, Аммаҕа аһыллан ситиһиилээхтик үлэлии тураллар.
— 2018 сылга бизнес-инкубатордар Ленскэйгэ уонна Өлүөхүмэҕэ үлэҕэ киириэхтэрэ. Ил Дархан Егор Борисов Анал туһаайыытыгар олоҕуран, 2020 сылга диэри бары улуустар муниципальнай тэриллиилэригэ урбаанньыттары өйүүр кииннэр аһыллыахтара, — диэн бэлиэтиир СӨ Инвестиция сайдыытын уонна предпринимательство дьыалаларын миниистирэ Антон Сафронов.
Биллэн турар, урбаанньыттары өйүүр кииннэр — бизнес-инкубатордар төһө көдьүүстээх үлэни тэрийэллэриттэн өрөспүүбүлүкэҕэ дьоҕус бизнес сайдыыта тутулуктаах.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА саайтыттан.