«Томмоттон Аллараа Бэстээххэ диэри тимир суолунан сырыы олоххо киириитэ Саха Өрөспүүбүлүкэтин тырааныспарга министиэристибэтин сүрүн соруга буолар», — диэн миниистир Семен Винокуров биллэрдэ. Бу кыһалҕа быһаарыллыыта Өрөспүүбүлүкэ сайдыытыгар көмө буолуоҕа.
Семен Винокуров, Саха Өрөспүүбүлүкэтин тырааныспарын уонна суол хаһаайыстыбатын миниистирэ:
— Аллараа Бэстээх станциятыттан быстах кэмҥэ мал таһыытын көҥүллээбиппитигэр 500 тыһ. тонна мал айаннаата. Мантан ыла тимир суол суолтата Саха Өрөспүүбүлүкэтигэр үрдээн иһиэҕэ. Бастатан туран, кэнники сылларга Өлүөнэ өрүс уута аччаан, уунан мал таһар сылтан сыл уустук буолан иһэр. Иккиһинэн, Томмоттон Аллараа Бэстээххэ диэри тимир суол киириитин дойду таһымыгар өйөөтөхтөрүнэ, бу сыл бүтүүтүгэр диэри толору сырыыны киллэриэ этибит. Оччоҕо удамыр сыаналаах тариф үөскүөҕэ. Тимир суол Аллараа Бэстээххэ диэри киирэригэр билигин улахан үлэ ыытыллар.
Билигин Аллараа Бэстээххэ причаллары тутар инвестиционнай бырайыактары олоххо киллэрэллэр. Бырайыагы «Дьокуускайдааҕы өрүс порда» уонна ЛОРП хампаанньалар сүрүннүүллэр.
Николай Попов, «Саха сирэ» хаһыат, edersaas.ru