«Алмаасэргиэнбаан» кэлэктиибэ Мохсоҕоллооххо тулаайах оҕолорго бэлэх оҥордо. Оҕолор күһүҥҥү сынньалаҥнарыгар Дьокуускайга А.Пушкин аатынан драма тыйаатырыгар уонна «Union party» оҕо киинигэр сылдьан улаханнык астынан, үөрэн-көтөн бардылар.
Бу туһунан АЭБ уопсастыбаннаһы кытары сибээскэ корпоративнай социальнай эппиэтинэскэ хайысхатын салайар Наталья Миронова иһитиннэрдэ. Кини оҕо дьиэтин иитиллээччилэрин бырабылыанньа бэрэссэдээтэлин солбуйааччы Анатолий Табунанов «Зажги осень» диэн бырааһынньыкка ыҥырбытын киэн туттан эттэ.
Оҕолор Дьокуускай куоракка кэлэн драма тыйаатырыгар «Бременские музыканты» остуоруйаҕа сылдьыбыттар. Салгыы тыйаатыры көрбүттэр-истибиттэр, хаартыскаҕа түһэргэ анаан бэлэмнэниллибит сирдэргэ өйдүү-саныы сылдьарга диэн хаартыскаларга түспүттэр. «Union party» кииҥҥэ кырачаан ыалдьыттары минньигэс астаах остуоллар күүппүттэр. Манна Хэллоуин күнүгэр аналлаах викторина ыытыллыбыт, PlayStation оонньообуттар, конструктордаабыттар. Үөрүүлээх көрсүһүү түмүгэр, бэлэхтэри туттан үөрүүлэрэ-көтүүлэрэ өссө үрдээбит.
Наталья Миронова кэпсээбитинэн, «Алмаасэргиэнбаан» өйөбүлүнэн быйыл сайын 203 микрооройуоҥҥа аһыллыбыт тулаайах оҕолору өйүүр настаабынньыктар кииннэригэр тэрээһиннэр тиһиктээхтик салҕаналлар. Манна оҕолору ас астыырга, иистэнэргэ, киэргэли оҥорорго, о.д.а. үөрэтэн маастар-кылаастары тэрийэллэр, улахан олох киэҥ аартыгар эрдэттэн бэлэмниир сүбэлэр-амалар ыытыллаллар. Ол чэрчитинэн, Мохсоҕоллоохтон кэлбит оҕолору кытары истиҥ көрсүһүү кэнниттэн, гамбургер бэлэмнииргэ үөрэппиттэр. «Алмаасэргиэнбаан» кэлэктиибэ тулаайах оҕолорго маннык үөрүүнү, умнуллубат бырааһынньыгы кэмиттэн кэмигэр оҥорорго бэлэм.