«Олохтоох дьону бырамыысыланнаска» бырайыакка олоҕуран, СӨ Дьарыктаах буолуутун судаарыстыбаннай кэмитиэтин уонна «АЛРОСА» АХ оробуочай бөлөҕө бу ый саҥата Бүлүү умнаһын улуустарыгар үлэлээтэ.
edersaas.ru
Бүлүү улуустара Ленскэйи, Мирнэйи кытары ыаллаһа олорор буоланнар, олохтоохтор ыраата барбакка, бу оройуоннарга баран баахтанан үлэлиир кыахтаахтар. Ол эрээри бырамыысыланнас хампаанньалара олохтоохтору үлэҕэ ылбаттар диэн үгүстүк истэбит. Быйыл өрөспүүбүлүкэҕэ Дьарыктаах буолууну көҕүлээһин сыла биллэриллэн уонна СӨ бырабыыталыстыбата бырамыысыланнас хампаанньаларын кытары сөбүлэһии түһэрсэн, олохтоохтор үлэҕэ хабыллыылара урукку сыллардааҕар биллэ элбиэхтээх.
Сунтаарга ыытыллыбыт көрсүһүүгэ 289 киһи кэлэн, бырамыысыланнас салаатыгар үлэлиир баҕалаахтарын эттилэр. Сүүмэрдээһин ыытыллан, 111 киһиэхэ үлэҕэ баралларыгар рекомендация бэриллибитин туһунан туһааннаах кэмитиэт пресс-сулууспата иһитиннэрдэ.
Оттон Ньурбаҕа олохтоохтортон 603 сайаапка киирэн, «АЛРОСА»-ҕа үлэлиэн сөптөөх 122 киһи талылынна. Үөһээ Бүлүүгэ 52, Бүлүүгэ 37 киһиттэн сайаапка ыллылар.
Бырамыысыланнас хампаанньаларыгар үлэлиэн баҕалаах дьону талыыга судаарыстыбаннай кэмитиэт оробуочай бөлөҕө атын улуустарга эмиэ үлэлиэҕэ.
Анивера АКИМОВА, edersaas.ru