“АЛРОСА” бу сыллааҕы былаанын уларыппат

Бөлөххө киир:

“АЛРОСА” бастакы вице-президенэ, толорор дириэктэр Игорь Соболев бэлиэтииринэн, хампаанньа дьону-сэргэни үлэнэн хааччыйарга бэлэм. Билиҥҥитэ, бу рудник 1148 үлэһитин үлэнэн хааччыйыахтаахтар. edersaas.ru

“Хампаанньа үлэһиттэри манна бэйэтигэр эбэтэр чугас тэрилтэлэригэр ыыталыаҕа. Ону таһынан, рудник тохтотуллан турар кэмигэр шахтердар орто хамнастарын, оттон атын үлэһиттэргэ орто хамнастарыттан үс гыммыт иккитин төлүөҕэ”, — диэн этэр Игорь Соболев.
Кини бэлиэтииринэн, атырдьах ыйын 25 күнүгэр диэри үлэһиттэри аттаран турорууга былаан оҥоһуллуоҕа. “Рудник төһө өр тохтотуллан туруоҕун этэр кыахпыт суох. Бастаан бэрэбиэркэлээн, саахал туохтан тахсыбытын быһаарыахпытын наада. Онон үлэһиттэри бары тэрилтэлэрбитинэн аттаран туруоруохпут. Сорохтор манна хаалан үлэлиэхтэрэ”, — диэн бэлиэтиир Игорь Виталиевич.
Манна даҕатан, Юрий Трутнев хампаанньа бары тэрилтэлэригэр быһыы-майгы хайдаҕын “Ростехнадзор” бэрэбиэркэлээн көрүөҕүн туһунан иһитиннэрдэ. “Хампаанньа атын тэрилтэлэригэр саппааһы хайа баҕарар элбэтэр кыахтааҕын таһынан саҥа бырайыактарга ылсан үлэлиир. Ол курдук, СӨ бырабыыталыстыбатын кытары Үөһээ Муунатааҕы сири туһаҕа таһаарыыга ылсан үлэлии сылдьар. Бу бырайыак алмааһы хостооһуҥҥа эмиэ төһүү күүс буолуоҕа. Онон хампаанньа бары бырайыактарынан алмаас хостооһунун элбэтэр сыаллаах, үп-харчы өттүнэн кыпчыттарыа суоҕа”, — диэн этэр Юрий Петрович.
Онон билиҥҥитэ хампаанньа бу сыллааҕы былаанын уларытар санаата суох. “Атын бырайыактарбытыгар алмааһы хостооһуммут кээмэйин улаатыннаран турабыт. Оттон үп-харчы чааһын ыллахха, алмааһы атыылааһын хостооһунтан тутулуга суох. Ырыынак хайдах хамсыырыттан тутулуктаах”, — диэн суруналыыстарга Игорь Соболев хампаанньа бу сыллааҕы былаанын туһунан быһааран биэрэр.

Аграфена КУЗЬМИНА, edersaas.ru

.

+1
0
+1
0
+1
0
+1
0
+1
0
+1
0
+1
0