Бу сайын АЛРОСА Иирэлээхтээҕи даамбата тоҕо баран, кирдээх уу Бүлүү эбэни 400 км тиийэ киртиппитэ улахан аймалҕаны таһаарбыта. Ол эрэн, алмаас хостуур бөдөҥ хампаанньа драга үлэлиир котлованнарыгар химикат, токсическай радиоактивнай эттиктэр уонна да атын киһи доруобуйатыгар кутталлаах эбиискэ суох диэн этэр. Ууну ыраастыыр оборудованиены туруоруунан уонна үлэлэтиинэн улуус дьаһалтата дьарыктаныахтааҕын тоһоҕолоон эттэ бэҕэһээ, сэтинньи 13 күнүгэр, АЛРОСА генеральнай дириэктэрин солбуйааччы Алексей Дьячковскай.
edersaas.ru
Кини сир баайын хостооччулартан киирэр нолуок 70% алмаастаах хампаанньа төлүүрүн, бүддьүөтү кини толорорун, 100-тэн тахса тыһ. бүддьүөт үлэһиттэрин хамнастыырын санатта. Быйыл өрөспүүбүлүкэ бүддьүөтүгэр АЛРОСА-тан 79,8 млрд солк. киириэхтээх.
Ону таһынан, хампаанньа аахсыйатын 8% тутан олорор Мирнэй, Ленскэй, Анаабыр, Ньурба, Бүлүү, Өлөөн, Үөһээ Бүлүү, Сунтаар улуустарыгар тэрилтэ барыһыттан өлүүлээн төлүүр. Холобур, 2014 с. хас биирдии улуус аайы 108,3 мөл. солк. төлөммүт, оттон 2018 с. 823 мөл. солк. бэриллибит.
«Нэһилиэнньэни ыраас уунан хааччыйыы боппуруостарын муниципальнай тэриллии бэйэтэ быһаарыахтаах. Ити дивиденд харчытынан улуустар бэйэлэрэ ууну ыраастыыр ыстаансыйаны атыылаһан ылан туруоруохтарын, үлэлэтиэхтэрин сөп. Харчыны туох сыалга тутталларын кинилэр бэйэлэрэ быһаараллар. АЛРОСА ууну ыраастыыр оборудованиены атыылаһарга 7 млрд солк. көрбүтэ даҕаны, үгүс эбийиэктэр үлэлээбэккэ тураллар», — диэн эттэ Алексей Дьячковскай.
Бүлүү бөлөх улуустарыгар АЛРОСА ууну ыраастыыр ыстаансыйаны тутар уонна саҥардар былааннаах. Ол эрэн, уһун кэмнээх ардах түһэн, даамба тоҕо барбытын бэлиэтээн эттэ кини.
Түөрт улахан улууһу иһэр уунан хааччыйа олорбут өрүс киртийбитин билигин Силиэстийэлиир кэмитиэт үөрэтэ сылдьар, ол кэнниттэн ким буруйдааҕын, төһө хоромньуну төлүүрүн суут быһаарыаҕа.
Экология министиэристибэтэ ааҕыытынан, Иирэлээх уонна Оччугуй Ботуобуйа өрүскэ 4,7 млрд солк. суумалаах хоромньу тахсыбыт.
Хоромньуну төлүүргэ хампаанньа ороскуота улаатан, бастатан туран, тэрилтэ барыһын көҕүрэтэрин, төлүүр дивиденнэригэр, бүддьүөккэ киирэр харчыга эмиэ охсорун, барыта эргиччи ситимнээҕин чуолкайдаата АЛРОСА генеральнай дириэктэрин солбуйааччы Алексей Дьячковскай.
Онон Бүлүү бөлөх улуустара алмаастаах хампаанньа экологическай алдьархайы оҥорбут хоромньутун төлүүрүгэр туруорсаллар даҕаны, биир өттүнэн улуус бүддьүөтүгэр киирэр өлүүскэ харчыларын кээмэйэ кыччыан, дохуоттара сарбыллыан сөп. Оннук куттал баарын эттилэр.
Марианна Тыртыкова, «Саха сирэ», edersaas.ru