Балаҕан ыйын 2 күнүгэр сарсыарда 6 чаас саҕана Алдан Эбэҕэ 6 киһини ууттан быыһаатылар.
edersaas.ru
Уус Алдан улууһун Чэриктэй с. олохтооҕо, охотовед Иннокентий Егоров кэргэниниин Елизаветалыын өрүс кытылыгар сылдьыбыттар. Ити бириэмэҕэ Елизавета дьон ыһыытаһар саҥатын истэ биэрбит. Дьулаан хаһыыны истибит дьахтар өрүс диэки көрбүтэ, уу ортотугар дьон булумахтана сылдьар эбит. Ону көрөөт да, кэргэнигэр сүүрэн тиийэн тыллаабыт.
Кэргэнниилэр өр толкуйдуу барбакка, улаханнык уолуйбакка, өрүс ортотугар харбыалаһа сылдьар дьону быыһыыр санаалаах тыыларынан түргэнник дьоҥҥо тиийбиттэр. Дьэ уонна ууга түспүт дьону биир-биир таһаартаабыттар. Субу өллүбүт диэн Орто дойду олоҕун кытары бырастыылаһар дьылҕаламмыт дьон Елизавета күүһүн-уоҕун, сатабылын сөхпүттэр.
Быыһаммыт дьон, ыал аҕалара Чэриктэй хорсун ыалыгар нөрүөн нөргүйэллэр. Кырдьыга да, алта киһини ууттан быыһыыр хорсун санаа, кыах киһи аайы бэриллибэт. Ол да иһин, быыһааччыларга, саха сэмэй ыалыгар тустаах наҕарааданы тиксэрэргэ көрдөһөллөр.
Надежда ЕГОРОВА, «Саха сирэ» хаһыат, edersaas.ru