Алтынньыга Арассыыйаҕа барыллааһын биэрэпис буолуоҕа. Бу 2020 с. ыытыллар бүтүн Арассыыйатааҕы биэрэпискэ бэлэмнэнии курдук ыытыллар. Уруккуттан уратыта диэн, бу сырыыга аныгы цифровой тиэхиньикэ туһаныллыаҕа.
Барыллаан биэрэпис икки түһүмэҕинэн ыытыллыаҕа.
Бастакы түһүмэх алтынньы 1-10 күннэригэр ыытыллар. Дьон-сэргэ судаарыстыбыннай өҥөлөр www.gosuslugi.ru сайтка киирэн бэлиэтэниэхтэрэ. Онлайн бэлиэтэнэргэ www.gosuslugi.ru сайтка регистрациялаах буолуохтааххын.
Иккис түһүмэх алтынньы 16-27 күннэригэр Арассыыйа 9 эрэгийиэнин 10 муниципальнай тэриллиитигэр ыытыллыаҕа. Иккис түһүмэх Хаҥалас улууһугар ыытыллыаҕа. Манна ыалынан сылдьан дьон ахсаанын ааҕыахтара. Интэриниэт нөҥүө бэлиэтэммит дьоҥҥо төлөпүөннэригэр бигэргэтэр СМС-код кэлбитин ааҕааччыга көрдөрдөххө, ааҕыыга кыттыбыт буолаҕын. Кэккэ биричиинэнэн интэриниэт нөҥүө бэлиэтэммэтэх дьону ааҕааччылар бланка толорон бэлиэтииллэр. Саха сирэ быйыл бастакытын барыллааһын биэрэпискэ кыттыыны ылар.
Ирина Гаевая, СӨ Судаарыстыбаннай статистика федеральнай сулууспатын салайааччыта:
— Барыллааһын ааҕыы 2020 сылга ыытыллар биэрэпискэ бэлэмнэнии буолар. Тэрээһин үлэтэ, тиэхиньикэ, сурук үлэтэ бэрэбиэркэлэнэр. Быйыл барыллааһын биэрэпис икки түһүмэҕинэн барыаҕа. Дьон интэриниэт нөҥүө www.gosuslugi.ru сайтка киирэн, кими да күүппэккэ, манаабакка бэлиэтэниэн сөп. Тиэхиньикэ сайдыбыт үйэтигэр олорорбут быһыытынан, төлөпүөн, планшет, көмпүүтэр нөҥүө барыллаан ааҕыыга кыттыахтарын сөп.
Күндү ааҕааччыларбытын алтынньыга ыытыллар Бүтүн Арассыыйатааҕы барыллаан биэрэпис ааҕыытыгар көхтөөх кыттыыны ыларгытыгар ыҥырабыт.
Николай Попов, «Саха сирэ» хаһыат, edersaas.ru