Бэҕэһээ киэһэ Мэҥэ Хаҥалас улууһун киинигэр, Аллараа Бэстээх бөһүөлэгэр, Тустуу саалатыгар АХШ Орегон штатыттан кэлэ сылдьар тустуук уолаттар (1999-2001 сс. төрүөх) Мэҥэ Хаҥалас көҥүл тустууга иитиллээччилэрин кытта 12 ыйааһыҥҥа табаарыстыы көрсүһүү көбүөрүгэр ким кыахтааҕын быһаарыстылар. Ити иннинэ икки күн Манньыаттаахха баар лааҕырга бииргэ дьарыктаннылар.
Ыалдьыттартан 46 киилэҕэ Дерик Кер Вадим Тастыгины, 74 киилэҕэ Логан Миик Матвей Гоголевы, 90 киилэҕэ Эйвери Джарамилло Василий Спиридоновы, 100 киилэҕэ Бо Кроуфорд Иван Филипповы уонна 122 киилэҕэ Адам Лэмб эмиэ Иван Филипповы (ыарахан ыйааһыҥҥа оҕо суох буолан, иккиһин туһунна) хотоннор, хамаандаларыгар кыайыы баалларын аҕаллылар.
Оттон олохтоохтортон 52 киилэҕэ Иннокентий Щелканов Райан Зеллери, 55 киилэҕэ Россия оҕолорго чөмпүйүөнэ Уйгулаан Иванов Рикки Хафы, 60 киилэҕэ Айсен Винокуров Гэвен Холлины, 64 киилэҕэ Владислав Кривошапкин Ноа Уотчсмуһу, 70 киилэҕэ Артем Аммосов Сойер Майерсы, 78 киилэҕэ Софрон Софронов Лэйтен Бригси, 85 киилэҕэ Иван Борисов Брюс Колтеры кыайа-хото туттулар.
Санатан эттэххэ, нэдиэлэ саҥатыгар оптуорунньукка Дьокуускайга “Триумф” спорт дыбарыаһыгар ыытыллыбыт табаарыстыы көрсүһүүгэ киин куорат хамаандата АХШ Орегон штатын хамаандатын 8:4 ахсаанынан сабырыйарыгар ыалдьыттарбытыттан кыайыы үөрүүтүн Дерик Кер (46), Гэвен Холли (60), Ноа Уотчмус (64), Логан Миик (74) билбиттэрэ, ол оннугар ыарахан ыйааһыннаахтар ытыстарын соттубуттара.
Мэҥэ сиригэр ахсааны таһынан түөрт бастакы чэпчэки ыйааһыҥҥа сэмсэ тустуу тэриллибитигэр Дерик эмиэ Ренат Гуляевы тулуппата, киниттэн уратылар Павел Кычкиҥҥа (52), Анатолий Никитиҥҥэ (55), Станислав Свинобоевка (60) баһыйтардылар.
Онон табаарыстыы көрсүһүү 7:5 ахсаанынан олохтоох Мэҥэ тустуук оҕолорун туһаларыгар түмүктэннэ. Америка бөҕөстөрө бүгүн аны Аммалыыр тэргэн айан суолун тутустулар. Онно кинилэри эмиэ табаарыстыы көрсүһүүгэ күүтэллэр. Бу сырыыга акыйаан уҥуордааҕы ыалдьыттарбыт, дьэ, хайаһаллар?
Василий НИКИФОРОВ, “Саха сирэ” хаһыат, edersaas.ru