Халлаан ардыыра-хаардыыра уурайан, дьэ, күөҕүн көрдөрдө, хаар ууллан бааһыналар арыый сараҕыйдылар. Онон, Амма хаһаайыстыбалара тутуу былдьаһан, бурдуктарын хомуйа таҕыстылар.
Тыа хаһаайыстыбатын управлениетын салайааччы Ион Кононов тэрийбит суһал мунньаҕар, хаһаайыстыба салайааччылара маҥнай утаа улаханнык арбы-сарбы буолан, дуоннаах үүнүүнү хомуйарбыт биллибэт дэспиттэрэ. Сүрүн агроном Николай Гаврильев даҕаны, хаар кэмигэр бааһыналары илэ көрбүт киһи, бурдук улаханнык сыппытын бэлиэтээбитэ.
Билигин хаһаайыстыбалар хомуурга таҕыстылар. Болугурдар бэҕэһээ биир хамбаайыны үлэлэттилэр, ол быыһыгар иккистэрин өрөмүөннүүллэр. Ньэчимиэн үчүгэй соҕус, олус тостубатах. 350 гектар ыһыыттан отучча бырыһыана сыппыт. Хамбаайыннарын хаамтаран көрдүлэр эрээри, улаханнык ылбат, бааһына арыый инчэҕэй соҕус, ол да буоллар, хайа сатанарынан хомуйа сатыахпыт дэһэллэр диир Николай Степанович. Маны сэргэ, Покровкаҕа сэттэ, Бөтүҥҥэ икки, Абаҕаҕа икки хамбаайын үлэлии сылдьар. Күн бүгүн улуус үрдүнэн, хаар иннинээҕи хомууру холбоон-илбээн, 336 гектартан 563 туонна туорахтаах култуура, гектартан ортотунан 17 центнер үүнүү хомулунна.
– Бурдук сыттын-сыппатын, син биир хомуйабыт. Быһа холоон, былааммытын 57 % толорорбут буолуо, – диир сүрүн агроном Николай Гаврильев.
Амматтан Олег Егоров, «Саха сирэ» edersaas.ru