Сорох интернет-сайтарга «Амма улууһугар оскуола оҕолоро гарааска бэнсиин сыттаабыттар уонна алҕас уоту ыытан, улахан баһаары таһаарбыттар, үс кыыс уонна биир уол эмсэҕэлээбиттэр» диэн ис хоһоонноох иһитиннэриилэр бэчээттэммиттэрэ. Ол төһөтө кырдьыгый?
Вера МАКАРОВА, «Саха сирэ» хаһыат, edersaas.ru
РФ Ыксаллаах быһыыга-майгыга министиэристибэтин Саха сиринээҕи управлениетын пресс-сулууспата иһитиннэрбитинэн, бэҕэһээ, ыам ыйын 23 күнүгэр, киэһэ 19.38 мүн. Амма сэлиэнньэтин баһаарынай чааһыгар тыллабыр киирбит — гараас умайа турарын туһунан.
Баһаарынайдар быһылаан сиригэр тиийиилэригэр, 20 кв. м. иэннээх гараас бүтүннүү уокка былдьаммыт. Баһаары умуруорууга 6 киһи уонна биир тиэхиньикэ кыттыбыт. Барыллаан быһаарыынан, уот оҕолор мэниктээһиннэриттэн турбут.
СӨ ИДьМ-тын пресс-сулууспата биһиги сайтпытыгар иһитиннэрбитинэн, улуустааҕы полицияҕа быраҕыллыбыт гараастартан биирдэстэрэ умайа турарын туһунан дьахтар эрийэн эппит.
Баһаар турбут сиригэр тиийбит суһал-силиэстийэлиир бөлөх быһаарбытынан, 13 уонна 14 саастаах обургу оҕолор мэниктээннэр, испиискэни уматан баран, гаас баллонугар бырахпыттар. Бэнсиини сыттаабатахтар.
Ол түмүгэр, үс оҕо сирэйин салатан, балыыһаҕа киллэриллибит. Медиктэр этэллэринэн, туруктара этэҥҥэ.
Вера МАКАРОВА, «Саха сирэ» хаһыат, edersaas.ru
Хаартыска: социальнай ситимтэн.