Соторутааҕыта Штип куоракка ыытыллыбыт көҥүл тустууга Македония чөмпүйэнээтигэр саха тустууга оскуолатын иитиллээччитэ Владимир Егоров 61 киилэҕэ диэри ыйааһыҥҥа былырыыҥҥы ситиһиитин хатылаан, кыахтаахтык бастаата.
Амма ыччата икки бастакы утарылаһааччытын илиилээх-атахтаах оҥортообото, ыраастык кыайталаата. Түмүк хапсыһыыга “Лирия” кулууп бэрэстэбиитэлин Фати Вейсели баһыйа тутан чөмпүйүөн үрдүк аатын ылла. Итинэн ыам ыйын саҥатыгар Каспийскайга буолар Европа чөмпүйэнээтигэр кыттар Македония сүүмэрдэммит хамаандатыгар киллэрилиннэ.
Бу күннэргэ Владимир тириэньэринээн – Саха Өрөспүүбүлүкэтин үтүөлээх тириэньэрэ Николай Рожинныын – Киевкэ көттө, онно Украина уһулуччулаах тустууктарын, тириэньэрдэрин бирииһигэр норуоттар икки ардыларынааҕы турнирга тустуоҕа. Салгыы Дан Колов түһүлгэтигэр кыттыаҕа.
Роман Попов, “Саха сирэ” хаһыат, edersaas.ru