Аммаҕа төһө даҕаны ыксаллаах быһыы-майгы ааспытын, халаан уута түспүтүн иһин, олохтоох дьаһалтаҕа син биир киэһэ хойукка диэри үлэлииллэр, төһө хоромньу тахсыбытын ааҕан, айылҕа алдьархайыттан эмсэҕэлээбит ыалларга кэлбит көмөнү тыыраллар, дьону хомуйан, субуотунньукка тахсаллар.
edersaas.ru
Мин куораттан айаннаан ыкса киэһэ, үлэ чааһын лаппа кэннэ тиийбитим, улуус баһылыгын бастакы солбуйааччы Иннокентий Климентов хоһугар баар. Социальнай эбийиэктэргэ төһө суумалаах хоромньу тахсыбытын, туох көмө киирбитин, эһиилги бар дьон күүтэр Саха сирин норуоттарын VII спортивнай оонньууларыгар туох тутуу бара турарын туһунан кэпсэттибит.
Быйыл Соморсун анныгар муус харан, халаан уута 1980 с. (10 м. 84 см.) историческай кирбиини куоһаран, 11 м. 22 см. тиийдэ. Стадион саҕа муус халыҥ халҕаһата өрүс туоруур сиригэр кэлэн иҥнэн, Өньүөс, Амма-Наахара, Чапчылҕан, Мээндиги, Сатаҕай нэһилиэктэрин уу ылбыта.
Өрөспүүбүлүкэттэн 21 мөлүйүөн киирдэ
Муниципальнай эбийиэктэргэ, ол иһигэр даамбалар, муосталар, суол-иис, туристическай базалар о.д.а. алдьанан, 46 мөл. 994 тыһ. суумалаах хоромньу таҕыста диэн хамыыһыйа аахта. “Өрөспүүбүлүкэ 21 мөл. 350 тыһ. солк. көмө харчыны ыыппытын эмсэҕэлээбит дьоҥҥо түҥэтэ сылдьабыт. Пропискалаах, докумуоннара барыта баар дьоҥҥо көмө харчы тута киирэр. В. Пучков кэлэн барбытын кэннэ өссө федеральнай харчыны туруорсааһыҥҥа үлэ бара турар. Ол эрэн, прописката суох, докумуоннара ситэ оҥоһуллубатах дьон эмиэ бааллар, кинилэри туһунан испииһэктиибит. Холобур, уһаайба ылан баран дьиэ туттубут эрээри, докумуоннарын оҥорторботох ыаллар суут нөҥүө хоромньуларын дакаастыыллар”, — диэн быһаарар улуус баһылыгын бастакы солбуйааччы.
Аммалар кыһалҕалаах кэмнэригэр туора турбатах өрөспүүбүлүкэ салалтатыгар, олохтоохторугар, куоракка баар биир дойдулаахтарын түмсүүтүгэр махтаналлар. Ордук чуолаан, 1 мөл. ыыппыт Ленскэй оройуонун, 405 000 солк. ыыппыт ХИФУ кэлэктиибин бэлиэтииллэр. Уопсайа, күн бүгүн 3 мөл. 670 тыһ. солк. көмө харчы киирбитин гараастара, баанньыктара ууга барбыт дьоҥҥо, элбэх оҕолоохторго, инбэлииттэргэ түҥэтэр санаалаахтар.
Уус Алдантан, куораттан бэйэлэрэ баҕа өттүнэн эр дьон кэлэн дьиэни көтүрэргэ, суолу оҥорорго көмөлөстүлэр. Маннык ыксаллаах түгэн аны хатыламматын туһугар ууга барбыт намыһах сиргэ турар уһаайбалары атын сиргэ атастаһан биэриэхтэрэ. Сир кодексатынан Амма нэһилиэгэр учаастак ылыы аукцион быһыытынан барыаҕа, оттон атын нэһилиэктэргэ учаастагы атастаһыы кыаллыан сөп эбит. Ол аата уу ылар учаастактарын дьаһалта дьонтон ылар уонна кинилэргэ үрдүк сиргэ уһаайба биэриэҕэ.
СЫЫППАРАЛАР:
16700 тахса киһи Амма улууһугар олороруттан
1030 эмсэҕэлээтэ
260 дьиэ ууга барда
46 мөл. 994 тыһ. суумалаах хоромньу таҕыста.
Марианна ТЫРТЫКОВА, «Саха сирэ» хаһыат, edersaas.ru