Амматтан төрүттээх СӨ Инвестицияҕа уонна урбааҥҥа миниистирэ Антон Сафронов биир дойдулаахтарыгар 830 тыһ. солк. көмө харчы, ас-таҥас хомуйан биэдэмистибэтин аатыттан туттарда. Ону таһынан, халаан уутуттан эмсэҕэлээбит урбаанньыттарга, турбаза хаһаайыннарыгар туох көмө оҥоһуллуон сөбүн олохтоох дьаһалта дьиэтигэр нэһилиэнньэни кытта көрсүһүүгэ кэпсээтэ.
edersaas.ru
—Аммаҕа гаас киириэхтээх. Онно, бастатан туран, тырааныспары көһөрөн, ГСМ ороскуотун лаппа кыччатыахпыт. Ол харчытын социальнай хайысхаҕа ыытыахпыт. Сыыйа дьиэ-уот ититиитин эмиэ гааска көһөрүөхпүт. Бу сайын өрөспүүбүлүкэ үрдүнэн 2 млрд үптээх олохтоох оҥорон таһаарааччылар пуондалара тэриллиэҕэ. Билигин үлэлии сылдьар урбаанньыттар кыахтарын улаатыннарарга чэпчэтиллибит усулуобуйалаах, 40 мөлүйүөҥҥэ диэри суумалаах кирэдьиит биэриэхпит. Бастаан, балтараа сыл кинилэр тугу да төлөөбөттөр, онтон кирэдьииттэрин уон сыл иһигэр төлүөхтээхтэр, бырыһыана 5-6 эрэ. Дьиҥэр, баан биэрэр кирэдьиитин бырыһыана итинтэн таһыччы үрдүк», — диэн миниистир туох өйөбүл оҥоһуллуон сөбүн билиһиннэрдэ.
Онон, Амма курдук кэрэ айылҕалаах дойдуга урбаан салгыы сайдарыгар, туристическай инфраструктура тупсарыгар, айанньыттары минньигэс аһынан күндүлүүр кафе ситимэ дэлэйэригэр сөптөөх усулуобуйа тэриллиэҕэ.
Марианна ТЫРТЫКОВА, «Саха сирэ» хаһыат, edersaas.ru