2016 сыл Амма улууһугар Ыччат сылынан биллэриллибитэ. Ааспыт нэдиэлэҕэ Амма улууһугар Сылы түмүктээтилэр уонна сол күн аны өрөспүүбүлүкэ үрдүнэн биллэриллибит Ыччат сылын улууска үөрүүлээхтик арыйдылар.
Станислав ИОВЛЕВ, edersaas.ru
Күнүс Амма дьаһалтатыгар улуус көхтөөх ыччата, ыччат ыһыаҕын, “Саха ыччатын тыа сиригэр” күрэхтэһии кыайыылаахтара, “Азия оҕолоро” оонньууга үлэлээбит волонтердар, нэһилиэк ыччаттарын лидердэрэ ыччат миниистирин бастакы солбуйааччы Василина Лукиналыын уонна улуус баһылыга Николай Архиповтыын көрүстүлэр. Көрсүһүүгэ сыл түмүгүнэн араас наҕараадалары туттардылар.
Тэрээһин саамай долгутуулаах түгэнинэн бастыҥ эдэр дьоҥҥо “Амма улууһун киэн туттар олохтооҕо” анал ааты туттарыы буолла. Бэлиэтээн эттэххэ, олохтоох дьаһалта сыл түмүгүнэн маннык ааты 300 киһиэхэ туттарда.
Киэһэ оройуон култууратын киинигэр олохтоох нэһилиэнньэни кытары көрүстүлэр. Онно ыччат сылын сэргэ Арассыыйаҕа Киинэ уонна Саха сиригэр Тупсарыы сылларын түмүктээтилэр. Баһылык Николай Архипов ааспыт сылга улуус үрдүнэн туох үлэ барбытын, тугу ситиспиттэрин кылгастык кэпсээтэ.
Бэлиэтээн эттэххэ, Амма улууһугар Киинэ сылын чэрчитинэн саҥа киинэ тыйаатыра арыллыбыта. Инньэ гынан, олохтоох нэһилиэнньэ аан дойду күөх экраныгар саҥа тахсар киинэлэри көтүппэккэ көрөр кыахтанна. Түмүккэ, Амма улууһугар быйыл Тупсарыы сылын биллэрдилэр. Тыа сирин уустук усулуобуйатын чэпчэтэргэ бу сыл улаханнык дьайыа диэн эрэнэллэр.
Улуус ыччатын лидерэ Максим Андреев Ыччат сылынан сиэттэрэн, Амма улууһун бары нэһилиэктэригэр ыччат лидердэрин анаабыта, бука бары хамнастаналларын ситиспитэ. Амма — хас биирдии нэһилиэгэр хамнастаах ыччат лидердээх өрөспүүбүлүкэҕэ соҕотох улуус.
Станислав ИОВЛЕВ, edersaas.ru