Анаабыр Сааскылааҕыттан сүппүт дьону көрдүү бөртөлүөт көттө

Бөлөххө киир:

Бу сарсыарда Сааскылаах — Үрүҥ Хайа хайысханан бөртөлүөт көтөөрү бэлэмнэнэр диэн СИА-ҕа «Анаабыр алмаастара» хампаанньа иһитиннэрбитэ. Бөртөлүөт сарсыарда 09.48 чааска көттө.

«Бөртөлүөккэ генеральнай дириэктэри кытта сири-дойдуну үчүгэйдик билэр түөрт булчут көтүөхтээх«, — диэн «Анаабыр алмаастара» хампаанньа бэрэстэбиитэлэ чуолкайдаата.

Анаабыр улууһунааҕы Биир кэлим диспетчерскэй сулууспа иһитиннэрэринэн, сүппүт дьону көрдүүр бөлөх бүтэһигин алтынньы 23 күнүгэр киэһэ 19.00 чааска биллэ сылдьыбыт. Бөлөх чуолкай ханан сылдьара, ханнык хайысханы тутуспута биллибэт. Манна диэн эттэххэ, улуус территориятыгар күн-дьыл туруга үчүгэй, уларыйара биллибэт диэн сылыктаатылар.

Санатан суруйдахха, Анаабыр улууһугар алтынньы 18 күнүгэр дьон сүппүт — икки эр киһи уонна биир кыыс диэн иһитиннэрии Саха сирин биир гына тарҕаммыта. Сааскылаахтан икки эр киһи уонна биир кыыс Үрүҥ Хайаҕа бураанынан айаннаабыттар. Нэһилиэнньэлээх пууннар икки ардылара — 160 км. Кэлин биллибитинэн, бу дьон иһигэр былырыын «Туман» диэн ырыанан биллибит игирэ аҥаара Кэрэчээнэ Туприна баар эбит. Кэрэчээнэ алтынньы 17 күнүгэр Дьокуускайтан Сааскылаахха кэлбит. Кинини көрсө диэн аҕата Олег Туприн доҕорун Федор Спиридоновы кытта Үрүҥ Хайаттан бураанынан кэлбиттэр.

Айтана Аммосова, edersaas.ru