Анаабыр табаларын өлөрүү кырдьыга-сымыйата билиннэ

Бөлөххө киир:

“Дьокуускайга табаһыттар оонньууларыгар сүүрүөхтээх Анаабыр табаларын кимнээх эрэ соруйан элбэх уотурбаны сиэтэн өлөрбүттэрин” туһунан уонна өссө ону “куоталаһыыга кыттыахтаах утарсааччылар оҥорбут буолуохтарын сөп” диэн сабаҕалааһыннаах сурах батсаап ситиминэн тилийэ көттө. Бу “сонун” төһө оруннааҕын чуолкайдаһаары Анаабыр улууһунааҕы тыа хаһаайыстыбатын управлениетын салайааччыта Ариан Неустроевтыын кэпсэтэ сырыттым.

Василий Никифоров, «Саха сирэ» хаһыат, www.edersaas.ru

— Сымыйа бөҕө буоллаҕа, — диир Ариан Владимирович. – Биһиги күрэхтэһиигэ анаан 18 табаны сөмөлүөтүнэн аҕалбыппыт. Бэнидиэнньиккэ көтөн кэлбиппит. Табаларбыт ипподромҥа күрүө иһигэр таһырдьа сылдьаллар. Туундара кыыллара буоллаҕа, куорат тыаһын-ууһун атыҥырыыллар, саҥардыы үөрэнэн эрэллэр. Биир табабыт аһыгар табыллыбакка уонна стреһи тулуйбакка өллө. Табалар уйаҥ кыыллар. Атыттар туруктара үчүгэй.

— Оччоҕо сарсын куоталаһыыга кыттарга толору бэлэм буоллаххыт?

— Оннук. Икки хамаанданы туруорабыт. Үлэ дьоруойа Илья Спиридонов аатынан хаһаайыстыба 2-с уонна 4-с ыстаадаларын табаһыттара бэйэлэрин табаларынан сүүрдүөхтэрэ. Күрэхтэһиигэ 16 таба сүүрэр. Оһоллонор түбэлтэлэригэр диэн, иккини солбукка аҕалбыппыт. Ити өлбүт табабыт уучахха сүүрүөхтээх этэ. Биллэн турар, бачча ыраах дойдуга кэлбит дьон бириискэ суоттанабыт. Ону сарсын биэтэк көрдөрүө буоллаҕа…

Василий НИКИФОРОВ.

+1
0
+1
0
+1
0
+1
0
+1
0
+1
0
+1
0