Былырыын ыам ыйыгар өрөспүүбүлүкэни бүтүннүү аймаабыт биир холуобунай дьыалаҕа суут бириигэбэрэ таҕыста. Ол — икки оҕо ийэтин Анастасия Андрееваны өлөрүү дьыалата.
edersaas.ru
Туохтан саҕаламмытай?
«Саха сирэ» хаһыат бу холуобунай дьыаланы хара маҥнайгыттан сырдаппыта — бастакы матырыйаал «Киһи уонна сокуон» балаһа 2016 сыл бэс ыйын 16 күнүнээҕи таһаарыытыгар “Тыыннаах көһүннэр ханнык!..” диэн төбөлөөх бэчээттэммитэ.
Санатар буоллахха, Дьокуускай куоракка 2016 сыл ыам ыйын 27 күнүттэн Андреева Анастасия Андреевна диэн 28 саастаах, икки оҕолоох эдэр дьахтар сураҕа суох сүппүтэ. Бу туһунан бастакы иһитиннэрии 2016 сыл бэс ыйын 6 күнүгэр “Сахапресс.ру” интернет-хаһыакка бэчээттэммитэ. Редакцияҕа кини доҕотторо кэлэн кэпсээбиттэрэ. Онно эппиттэринэн, Анастасия Петровскай уулуссатын 38 нүөмэригэр турар дьиэттэн түүн 03.30 мүн. тахсан, суолтан массыына тутан барбыт, онтон ыла сибээскэ тахсыбатах.
Ити иһитиннэриигэ олоҕуран, силиэстийэ уорганнара бастаан бэрэбиэркэ анаабыттара, онтон бэс ыйын 10 күнүгэр РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэрийбиттэрэ. Быралгы бара үөрүйэҕэ суох киһи эмискэ сүттэҕинэ, силиэстийэлиир дьайыылары толорутук ыытар туһуттан, дьыала чопчу ити ыстатыйанан тэриллэр.
Итиэннэ дьыала тэрилиннэр эрэ, быраабы араҥаччылыыр уорганнар силиэстийэ дьайыыларын, суһал-ирдиир тэрээһиннэри, дьыала хаамыытын, туох үлэ ыытылларын киэҥ эйгэҕэ иһитиннэрэ-биллэрэ турар эбээһинэстэрэ суоҕунан, кэтиирбитигэр, кэтэһэрбитигэр эрэ тиийбиппит. Анастасия тыыннаах көстүөҕэр эрэммиппит.
Хомойуох иһин, ол эрэл санаа туолбатаҕа – Анастасия Андреева өлөрүү сиэртибэтэ буолбутун 2016 сыл бэс ыйын 19 күнүгэр РФ Силиэстийэлиир кэмитиэтин Саха сиринээҕи управлениета иһитиннэрбитэ. Бу өлөрүүгэ уорбаланан, бэс ыйын 19 күнүгэр 2016 сыл олунньу ыйыгар хаайыыттан босхоломмут икки урдус тутуллубута.
Силиэстийэ онно сабаҕалаабытынан, ол күн кинилэр олорсон испит массыыналара Лермонтов уулуссатыгар «куоластыы» турар Анастасияҕа тохтоон олордубут. Кирзавод оройуонугар кэлэн, айдаарсыы түмүгэр, кыыһы өлөрөн баран, оҥхой сиргэ кистээбиттэр уонна лабааларынан саппыттар. Уорбаланааччылар өлөрүүгэ сыһыаннаахтарын билиммиттэр, ол сири силиэдэбэтэллэргэ ыйан биэрбиттэр.
Суут уурааҕа
Бу холуобунай дьыалаҕа СӨ Үрдүкү суутун бириигэбэрэ бэҕэһээ, от ыйын 20 күнүгэр, таҕыста.
Суут быһаарбытынан, 2016 сыл ыам ыйын 27 күнэ үүнэр түүнүгэр бу урдустар таксинан Лермонтов уулуссатынан айаннаан испиттэр. Ол иһэн, аара суолга билбэт кыыстара массыына «куоластыы» турарын көрөн, суоппары тохтууругар эппиттэр. Өлүү болдьохтоох, кыыс бу массыынаҕа олорсубут.
Марха оройуонугар кэлэн, суоппар олорсубут дьон этиитин толорон, кинилэри хааллартаан барбыт. Оттон бу 26, 27 саастаах урдустар кыыһы ойуурга илдьэн күүһүлээбиттэр.
Онуоха Анастасия полицияҕа үҥсүөм диэбитигэр абаран уонна куттанан, өлөрөргө быһаарыммыттар. Биирдэстэрэ төбөҕө охсубут, ол кэнниттэн муомахтыы, хабарҕатын быһа сатаабыттар, онтон көлүөһэ дискэтинэн хаста да төбөҕө охсон, тыынын быспыттар.
Өлөрөн бараннар, дьаамаҕа кистээбиттэр, өлөрүүгэ туттубут малларын тыаҕа онон-манан бырахпыттар. Онтон өлүктэн биһилэҕин устан баран, куотар аакка барбыттар.
Ити ыар буруйу оҥорон баран, 2016 сыл ыам ыйыгар-бэс ыйыгар өссө хас да буруйу оҥорбуттар — дьоҥҥо саба түһэн, суотабай төлөпүөннэрин, харчыларын, малларын халаабыттар.
Бөрөстүүпүнньүктэр Үөһээ Бүлүүгэ саһа сылдьыбыттарын оперативниктар туппуттар. Өлүк ханна сытарын бэйэлэрэ ыйан-көрдөрөн биэрбиттэр.
Силиэстийэ кэмигэр ыытыллыбыт судебнай психолого-психиатрическай экспертиза быһаарбытынан, хайалара да психическэй ыарыылара суох, тугу оҥороллорун бэркэ диэн өйдүүллэр.
Суут мунньаҕар буруйдарын толору билиммиттэр, өссө аһыннаттара сатаабыттар!
Өрөспүүбүлүкэ Үрдүкү суутун уурааҕынан, Федоров 20 сылга, Казаков 19 сылга кытаанах эрэсиимнээх холуонньаҕа көҥүллэрэ быһыллыбыт.
Бириигэбэр сокуоннай күүһүгэр киирэ илик. Өрүттэр ааһыныахтарын сөп.
Бу туһунан СӨ Борокуратууратын пресс-сулууспата уонна РФ СК Саха сиринээҕи управлениета иһитиннэрдилэр.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн уонна Якутск.ру.