Анатолий Бравин сиэрдээх буолууга болҕомтотун ууруоҕа

Бөлөххө киир:

Алтынньы 26 күнүгэр Ил Дархан ыйааҕынан Анатолий Бравин Гражданскай уопсастыба институттарын сайдыытын миниистиринэн анаммыта. Бэҕэһээ Анатолий Дмитриевиһы министиэристибэҕэ билиһиннэрбиттэрэ. Киниттэн бастакы үлэтин күнүн, уопсастыбаннаһы кытары үлэлэһиитин туһунан ыйыталастыбыт.

edersaas.ru.


— Анатолий Дмитриевич, үлэҕин өссө өрөбүллэртэн саҕалаабыккын. Бастакы үлэҥ күннэрэ хайдах аастылар? Үлэҕин хайдах быһыылаахтык торумнаан эрэҕин?
— Бу өрөбүллэртэн үлэбин саҕалаан, икки тэрээһиҥҥэ сырыттым. Мин саныахпар, билигин дьон-сэргэ бэйэ-бэйэтигигэр убаастабыллаахтык сыһыаннаһыытыгар бастакы, уустук да буоллар, эрэллээх хардыыларын оҥорон эрэр. Итиннэ судаарыстыба өттүттэн кэмигэр болҕомто уурулунна дии саныыбын.
Тоҕо диэтэргин, билигин интэриниэт, информационнай технология хас биирдии киһи олоҕор кимэн киирбитинэн сибээстээн, уопсастыба уонна информационнай эйгэ биир тэҥ өйдөбүллээх буоллулар. Олох бары эйгэтигэр кумааҕыттан электроннай көрүҥҥэ көһүү бара турар. Күн аайы олус элбэх информацияны ылынабыт. Онтон саамай туһалааҕын, кырдьыгын, үтүөнү-мөкүнү сиидэлээн ылыы бэйэтэ туспа сатабыл эбээт. Онно сиэрдээх буолуу, бэйэ-бэйэни убаастаһыы, атын киһи санаатын истэ үөрэнии улахан оруолу ылар. Онон инники үлэбэр бу хайысхаҕа болҕомтобун ууруом дии саныыбын.
— Сүүрбэттэн тахса сыл устата уопсастыбаннаһы кытары, ол иһигэр биир тэрилтэҕэ, Информационнай кииҥҥэ, 16 сыл, үлэлээн кэллиҥ. Эн санааҕар, уопсастыбаҕа туох уларыйыы таҕыста?
— 17 сыл анараа өттүгэр СР Норуоттарын уонна федеративнай сыһыаннаһыыларын министиэристибэтигэр үлэлиир кэммэр уопсастыбаннай тэрилтэлэри кытта олус чугастык алтыһан үлэлээбитим. Кэлин, төһө да арыый атын эйгэҕэ сылдьыбытым иһин, сибээспин быспакка үлэлэһэн кэллим. Ол курдук, Ил Дархан иһинэн национальнай бэлиитикэ сүбэтигэр, итэҕэл боппуруостарын хамыыһыйатыгар үлэлэһэбин.
Биир өттүттэн көрдөххө, бу ааспыт сүүрбэччэ сыл иһигэр улахан уларыйыы тахсыбатах курдук буолуон сөп. Ол эрээри өй-санаа өттүнэн таһыммыт биллэ уларыйда. Биһиги урут өрөспүүбүлүкэбит иһиттэн тахсыбакка, бүөмнээн олорбут буоллахпытына, билигин араас норуоту кытта тэҥҥэ сайдар, алтыһар, ону ааһан түмэр кыахтанныбыт. Ити, биллэн турар, сайдыыга, үөрэҕи-билиини ылыныыга улаханнык дьайар. Билигин аны ис култуураны сайыннарыы барыахтаах дии саныыбын.

Ыспыраапка: Бравин Анатолий Дмитриевич
1962 с. муус устар 21 күнүгэр Таатта улууһун Ытык Күөл нэһилиэгэр төрөөбүтэ.
1984 с. СГУ История, филология факультетын үөрэнэн бүтэрбитэ. Идэтинэн историк, философскай наука кандидата. Үлэтин үөрэммит факультетыттан саҕалаабыта. Факультекка партия босхоломмут сэкирэтээринэн үлэлээн баран, 1986 с. философия кафедратыгар ассистенынан үлэлии киирбитэ. Бу кэмҥэ Санкт-Петербурдааҕы судаарыстыбаннай университекка аспираннаабыта.
1992-1994 сс. СГУ Социология кафедратыгар преподавателинэн, ассистенынан, Үп, экономика факультетыгар деканы солбуйааччынан үлэлээбитэ.
1994-2001 сс. Норуоттар дьыалаларын уонна федеративнай сыһыаннаһыы миниистирин бастакы солбуйааччынан анаммыта.
2001-2017 сс. Информационнай киин генеральнай дириэктэринэн үлэлээн кэллэ.
Россия наукатын академиятын научнай сэбиэтин чилиэнэ.

Аграфена КУЗЬМИНА, “Саха сирэ” хаһыат, edersaas.ru.

+1
0
+1
0
+1
0
+1
0
+1
0
+1
0
+1
0