Андрей Бекренев аан дойду чөмпүйэнээтигэр тустар буолла

Ааптар: 
Бөлөххө киир:

Орто Халыматтан төрүттээх Андрей Бекренев Белоруссия сүүмэрдэммит хамаандатыттан аан дойду чөмпүйэнээтигэр 61 киилэҕэ диэри ыйааһыҥҥа тустуоҕа. Бу туһунан хамаанда кылаабынай тириэньэрэ Александр Ласица иһитиннэрдэ.


Балаҕан ыйыгар ыытыллыбыт Александр Медведь бирииһигэр норуоттар икки ардыларынааҕы турнир түмүгүнэн аан дойду чөмпүйэнээтигэр кыттар Белоруссия хамаандата сүүмэрдэммитэ. Онно арай 61 киилэҕэ диэри ыйааһыҥҥа ким тустуоҕа биллибэккэ турбута. Бу ыйааһын лидерэ, Яшар Догу Гран-при күрэхтэһиитин боруонса призера Андрей Бекренев Дьокуускайга буолбут Дмитрий Коркин турнирыгар атаҕын өлөрөн, Минскэйдээҕи түһүлгэни көтүтэргэ күһэллибитэ. Онон, тириэньэрдэр сүбэлэһэн баран, 61 киилэ лидердэрин Асасдулла Лачиновы уонна Андрей Бекреневы туһуннарарга быһаарбыттара.

Александр Ласица эппитинэн, алтынньы 2 күнүгэр буолбут хапсыһыы 1:1 ахсаанынан түмүктэммит, манна сэрэтиинэн Андрей Бекренев кыайыылааҕынан тахсыбыт. Онон өссө биир саха тустууга оскуолатын иитиллээччитэ аан дойду чөмпүйэнээтигэр кыттар буолла.

Бу улахан түһүлгэҕэ Андрейы сэргэ Белоруссия хамаандатыттан Владислав Андреев (57 кг) уонна Ньургун Скрябин (65 кг) тустуохтара. Өссө биир саха бөҕөһө Владимир Егоров 57 киилэлээхтэргэ Македония былааҕынан кыттыаҕа.

Санатан эттэххэ, тустуу үс көрүҥэр – классическай, көҥүл уонна дьахтар тустуутугар – аан дойду чөмпүйэнээтэ алтынньы 22-28 күннэригэр Венгрия киин куоратыгар буолар.

Роман ПОПОВ, «Саха сирэ» хаһыат, edersaas.ru

Хаартыска интэриниэттэн ылылынна

+1
0
+1
0
+1
0
+1
0
+1
0
+1
0
+1
0