Андрей Ноговицын: хаһыат тула түмсүөҕүҥ!

Бөлөххө киир:

Ааспыт нэдиэлэҕэ “Саха сирэ” өрөспүүбүлүкэтээҕи хаһыат эрэдээксийэтэ Чурапчыга тиийэн ааҕааччылары кытары көрсөн, сибээскэ, айти-технологияҕа “төгүрүк остуол” ыытан кэллэ. Бу туһунан Чурапчы улууһун баһылыга Андрей Ноговицын санаатын үллэстэр.

edersaas.ru

Быйыл биһиги Чурапчы улууһугар Оҕо уонна ыччат дьоҕурун сайыннарыы сылын биллэрбиппит. Оҕо дьоҕурун, талаанын сайыннарыыга, кини дьаныарын, дьулуурун өйөөһүҥҥэ бу маннык анал сылы биллэрии, мин санаабар, хайа да өттүнэн табыгастаах. Ол сиэринэн, бу хайысхаҕа сыл устата үгүс үлэ ыытылынна, элбэх тэрээһин буолан ааста. “Саха сирэ” хаһыат тэрээһиннэрэ эмиэ оҕону, ыччаты иитиигэ, кинилэр духуобунай өттүнэн баай буолалларыгар ыытыллыбыт, ону ааһан бүтүн нэһилиэнньэни түмэ тардар дьаһаллар буолаллар.
Ил Дархан Айсен Николаев өрөспүүбүлүкэ социальнай-экэнэмиичэскэй сайдыытыгар, цифровизацияҕа, үөрэхтээһиҥҥэ анал ыйаахтары таһаарда. Бу ыйаахтары сиһилии “Саха сирэ” хаһыакка аахпыт буолуохтааххыт. Айсен Сергеевич бу докумуоннарга өрөспүүбүлүкэ сайдыытын сүрүн тосхоллорун ыйда. Ол курдук, бэйэ оҥорон таһаарыытыгар, үөрэхтээһин эйгэтигэр, чуолаан үөрэх хаачыстыбата тупсарыгар, ону таһынан, цифровизацияҕа болҕомтотун уурда. Чурапчы улууһугар былырыын икки нэһилиэккэ, Бахсыга уонна Арыылаахха оптоволокно ситимэ киирбитэ. Ити барыта тыа сирин сайдыытыгар төһүү күүс буолуоҕа диэн бүк эрэллээхпит.
Манна даҕатан эттэххэ, ааспыт нэдиэлэҕэ улууспутугар олохтоох оҥорон таһаарыыга туһуламмыт 12-с төгүлүн ыытыллар форум буолан ааста. Манна илин эҥээр улуустары таһынан, Хаҥаластан, Намтан, Дьокуускайтан кэлэн кытыннылар. Чурапчы улууһа урут-уруккуттан этинэн-үүтүнэн биллэр. Бу форумҥа бородууксуйаны оҥорон таһаарааччыларбыт, бааһынай хаһаайыстыбаларбыт, ону сэргэ агро-­оскуоларбыт үлэлэрин дьон-сэргэ сэргии көрбүтүттэн, уопут ­атастаспытыттан тус бэйэм астынным. Форуммут сыалын-соругун толору ситистэ диэн сыаналыыбын. Өскөтүн ааспыт сылга кыстыгы бэрт ыараханнык туораабыт буоллахпытына, быйыл кыстыкка бэлэммит үчүгэй. Өҥ сыл туран, былааннаммыт оппутун, сүөһү эбии аһылыгар үүннэрбит бурдукпутун барытын ыллыбыт. Онон ааспыт сыллааҕы сүтүкпүтүн (сылгы ахсаанын) ситиһиэхпит диэн былаан­наан олоробут.
Түмүкпэр этиэм этэ, Чурапчы тыа хаһаайыстыбатын таһынан, спордунан, дьонунан-сэргэтинэн биллэр. Үлэбит-хамнаспыт, чулуу дьоммут “Саха сирэ” хаһыакка тиһигин быспакка сырдатылла турарыттан үөрэбит. Тус бэйэм “Саха сирин” уруккуттан суруттарабын, ааҕабын. Ааҕааччы быһыытынан, дойду үрдүнэн, өрөспүүбүлүкэҕэ буола турар сайдыыны, хамсааһыннары, саҥа былааннары барытын сырдата турар, улуустар уопуттарын киэҥ эйгэҕэ тарҕатар, дьоҥҥо-сэргэҕэ сүбэ-ама буолар, үтүө үгэстэри ситимниир, уопсастыба уонна былаас далаһата буолар өрөспүүбүлүкэ сүрүн хаһыатын быһыытынан сыаналыыбын. Онон өрөспүүбүлүкэ олохтоохторун “Саха сирин” кытары бииргэ буолуҥ, хаһыат тула түмсүөҕүҥ, санаабытын холбоон Сахабыт сирин сайыннарыаҕыҥ диэн ыҥырабын.

Андрей НОГОВИЦЫН, Чурапчы улууһун баһылыга.

+1
0
+1
0
+1
0
+1
0
+1
0
+1
0
+1
0