Саха Өрөспүүбүлүкэтин “Сыл бастыҥ учуутала-2018” кыайыылааҕа билиннэ.
Саха сирин быйылгы сыллааҕы бастыҥ учууталынан буолла – Дьокуускай куораттааҕы Классическай гимназия нуучча тылын уонна литературатын учуутала Анна Алексеевна Платонова! Эҕэрдэлиибит!
Биллэрин курдук, бэҕэһээ, куонкурус үһүс күнүгэр, “Маастар-учуутал” быһаарыылаах иккис туур ыытыллыбыта, онно куонкурус 5 лауреата ааттаммыта: История уонна обществознание учуутала Айаал Мохначевскай Үөһээ Бүлүү улууһуттан, химия учуутала Алина Гаврильева Нам улууһуттан, история уонна обществознание учуутала Мария Оконешникова Таатта улууһуттан, нуучча тылын, литературатын учуутала Анна Платонова Дьокуускайтан уонна английскай тыл учуутала Яна Юсупова Нерюнгриттэн.
Бүгүн, муус устар 6 күнүгэр, бээтинсэҕэ, куонкурус түмүктүүр түһүмэҕэ ыытылынна. Онно, дьүүллүүр сүбэ быһаарыытынан, абсолютнай кыайыылааҕынан тахсан, СӨ “Сыл бастыҥ учуутала-2018” дьоһуннаах аат Анна Платоноваҕа иҥэрилиннэ.
Анна Алексеевна Саха Өрөспүүбүлүкэтин чиэһин көмүскүү Бүтүн Арассыыйатааҕы “Сыл бастыҥ учуутала-2018” куонкуруска кытта барыаҕа.
Татьяна МАРКОВА, «Саха сирэ» хаhыат, edersaas.ru